Trump sagður hafa boðið Assange náðun gegn vitnisburði

Lögmaður Julians Assange, stofnanda uppljóstranavefsins Wikileaks, hélt því fram fyrir dómi að bandarískur fyrrverandi þingmaður hefði borið Assange þau skilaboð að Donald Trump Bandaríkjaforseti væri tilbúinn að náða hann ef hann bæri vitni um að Rússar hefðu ekki brotist inn í tölvupósta Demókrataflokksins. Talskona Hvíta hússins segir fullyrðingarnar „fullkomna lygi“.

Mál um hvort Assange verði framseldur til Bandaríkjanna þar sem hann er ákærður fyrir aðild að tölvuinnbroti og fleiri brot velkist nú um fyrir breskum dómstólum. Það var við fyrirtöku í málinu í dag sem Edward Fitzgerald, lögmaður Assange, vísaði til vísbendinga um að Dana Rohrabacher, fyrrverandi fulltrúadeildarþingmaður Repúblikanaflokksins í Bandaríkjunum, hefði fundað með Assange þegar hann var enn í ekvadorska sendiráðinu í London í ágúst árið 2017.

Rohrabacher á að hafa sagt Assange að Trump forseti byði honum náðun eða aðra leið út úr saksókn í Bandaríkjunum ef Wikileaks-stofnandinn bæri vitni um að Rússar hefðu ekki komið nálægt innbroti í tölvupóstþjóna landsnefndar Demókrataflokksins fyrir forsetakosningarnar árið 2016, að því er The Guardian hefur upp úr yfirlýsingu lögmanna Assange.

Sjá einnig: Háttsettur repúblikani sagðist halda að Pútín borgaði Trump

Wall Street Journal hafði eftir Rohrabacher í september árið 2017 að hann hefði falast eftir samkomulagi þar sem Assange hefði afhent tölvudrif og fleiri minnisdrif sem sýndu fram á að Rússar hefðu ekki stolið tölvupóstunum sem var síðar lekið í gegnum Wikileaks.

Segist varla þekkja þingmanninn en bauð honum í Hvíta húsið

Stephanie Grisham, blaðafulltrúi Hvíta hússins, vísaði fullyrðingunum á bug og sagði að Trump forseti þekkti Rohrabacher varla sem annað en fyrrverandi þingmann.

„Hann hefur aldrei talað við hann um þetta mál eða næstum hvaða mál sem er. Þetta er alger tilbúningur og alger lygi,“ sagði Grisham.

Engu að síður sagði bandaríska dagblaðið Politico frá því að Trump hefði boðið Rohrabacher, sem er þekktur verjandi Vladímírs Pútín Rússlandsforseta, til fundar í Hvíta húsinu í apríl árið 2017. Tæpu ári síðar sagði Rohrabacher að John Kelly, þáverandi starfsmannastjóri Hvíta hússins, hefði komið í veg fyrir að þeir Trump hittust aftur.

Trump lýsti jafnframt yfir opinberum stuðningi við Rohrabacher fyrir þingkosningarnar í nóvember árið 2018. Í tísti sagði hann þingmanninn hafa verið frábæran fyrir kjósendur sína í Kaliforníu. Rohrabacher náði engu að síður ekki endurkjöri.

Hafnar niðurstöðu leyniþjónustunnar um afskipti Rússa

Bandaríska leyniþjónustan telur að Pútín Rússlandsforseti hafi sjálfur skipað fyrir um innbrot leyniþjónustu hans í tölvupósta Demókrataflokksins. Það hafi hann gert til þess að hjálpa Trump að ná kjöri. Wikileaks birti fyrst vandræðalega tölvupósta demókrata á ögurstundu í framboði Trump, kvöldið sem Washington Post sagði frá gamalli upptöku þar sem Trump heyrðist stæra sig af því að hann áreitti konur kynferðislega.

Trump hefur aldrei viljað viðurkenna niðurstöðu leyniþjónustunnar um afskipti Rússa og tók jafnvel neitanir Pútín fram yfir hana þegar leiðtogarnir hittust í Helsinki sumarið 2018. Forsetinn er sagður sérstaklega viðkvæmur fyrir afskiptunum því hann telji umræðu um þau grafa undan kosningasigri hans.

Forsetinn hefur ítrekað vegið að rannsókn dómsmálaráðuneytis Bandaríkjanna sem Robert Mueller, fyrrverandi forstjóri alríkislögreglunnar FBI, stýrði á því hvort að framboð Trump hefði átt í samráði við Rússa í aðdraganda kosninganna.

Samskipti Trump við úkraínsk stjórnvöld sem urðu til þess að fulltrúadeild Bandaríkjaþings kærði forsetann fyrir embættisbrot gengu meðal annars út á að fá þau til að rannsaka stoðlausa samsæriskenningu um að það hefðu verið Úkraínumenn en ekki Rússar sem reyndu að hafa áhrif á forsetakosningarnar árið 2016.