Bannon neitaði sök

Steve Bannon, fyrrverandi ráðgjafi Bandaríkjaforseta hefur lýst yfir sakleysi sínu eftir að hafa verið handtekinn um borð í snekkju í dag, grunaður um fjárdrátt.

Bannon, auk annarra skipuleggjenda fjársöfnunar fyrir landamæramúr Donald Trump Bandaríkjaforseta eru sagðir hafa dregið að sér fé úr söfnuninni.

Skipuleggjendur lofuðu að allt féð sem safnaðist myndi renna til framkvæmdar á landamærum Bandaríkjanna og Mexíkó. Alls söfnuðust yfir 25 milljónir Bandaríkjadala á meðan að söfnunin stóð yfir samhliða kosningabaráttunni 2016.

Samkvæmt ákæru sem gefin hefur verið út á hendur Bannon endaði mikill hluti féssins í vösum skipuleggjenda. AP greinir frá því að Bannon sé sakaður um að hafa hirt eina milljón dala og nýtt peninginn í persónuleg útgjöld.

Bannon var handtekinn af sveitum rannsóknardeildar bandarísku póstþjónustunnar á snekkjunni Lady May úti fyrir ströndum Connecticut snemma í morgun. Var hann færður fyrir dómara skömmu síðar og neitaði sök.

Var honum síðar sleppt gegn greiðslu 5 milljóna dala tryggingargjalds. Bannon starfaði sem helsti ráðgjafi Trump forseta frá embættistöku 20. janúar 2017 til ágúst sama árs. Áður hafði hann starfað við framboð Trump.