Albert skaut AZ á­fram í Meistara­deildinni með tveimur mörkum

AZ Alkmaar er komið áfram í 3. umferð forkeppni Meistaradeildarinnar eftir 3-1 sigur á Viktoria Plzen í framlengdum leik í Hollandi í dag.

Plzen komst yfir á 77. mínútu með marki David Limbersky en það var í uppbótartíma sem AZ fékk vítaspyrnu og úr henni skoraði Teun Koopmeiners.

Albert kom svo AZ í 2-1 á 98. mínútu er hann slapp einn fyrir og þrumaði boltanum í slá og inn og tveimur mínútum fyrir leikslok bætti hann við öðru marki sínu og þriðja marki AZ.

Albert byrjaði á bekknum og kom inn á þegar hálftími var eftir af venjulegum leiktíma. Hann þakkaði heldur betur traustið. Frábær innkoma hjá KR-ingnum.

Komast þarf í gegnum fjórar umferðir til þess að tryggja sér sæti í riðlakeppninni en hollenska liðið er nú komið í 3. umferðina. Ekki er ljóst hverjum AZ mætir í 3. umferðinni.