Leita skips með 43 skip­verjum og sex þúsund naut­gripum

Japanska strandgæslan leitar nú við afleit veðurskilyrði að 43 skipverjum flutningaskips sem talið er að hafi sokkið suðvestur af landinu. Neyðarboð var sent frá skipinu í nótt. Verið var að flytja um sex þúsund nautgripi með skipinu.

Fellibylurinn Maysak gengur nú yfir svæðið, en björgunarmönnum hefur tekist að ná einum skipverja á lífi úr sjónum.

BBC segir frá því að 39 skipverjanna séu frá Filippseyjum, tveir frá Nýja-Sjálandi og tveir frá Ástralíu.

Maðurinn sem náðist úr sjónum er frá Filippseyjum og sagði hann skipinu hafa hvolft. Hafi hann ekki séð neina aðra úr áhöfninni eftir að hann fór sjálfur í sjóinn, klæddur björgunarvesti.

Á leið frá Nýja-Sjálandi til Kína

Flutningaskipið, Gulf Livestock 1, sigldi úr höfn á Nýja-Sjálandi um miðjan síðasta mánuð, og sigldi áleiðis til Kína. Í yfirlýsingu frá utanríkisráðuneyti Nýja-Sjálands segir að búist hafi verið við að siglingin tæki sautján daga.

Neyðarboð var sent úr skipinu vestur af japönsku eyjunni Amami Oshima.