Arnar Þór: Menn hafa sínar skoðanir sem er gott

Gaupi ræddi við Arnar Þór Viðarsson - þjálfara íslenska U21 árs landsliðsins í knattspyrnu - í dag en Ísland mætir Svíþjóð á morgun. Arnar Þór segir gott að fólk hafi skoðanir á vali sínu en það sé á endanum undir honum og þjálfarateymi liðsins hverjir eru valdir.

Spjall Gaupa og Arnars má sjá í spilaranum hér að neðan.

„Erfiður leikur á morgun. Við fórum illa út úr leiknum í Svíþjóð og töpuðum stórt svo við erum staðráðnir í því að bæta fyrir það og ná í úrslit í morgun. Mér lýst bara vel á þetta, strákarnir eru búnir að vera frábærir alla vikuna og við erum búnir að vera mikið og lengi saman svo við höfum getað nýtt tímann ágætlega,“ sagði Arnar Þór um leik morgundagsins.

Arnar og Eiður Smári Guðjohnsen – aðstoðarþjálfari – voru gagnrýndir fyrir valið á liðinu. Þeir Valgeir Valgeirsson [HK] og Valgeir Lunddal Friðriksson [Valur] voru ekki í upprunalega leikmannahópnum en komu inn í hópinn þegar Finnur Tómas Pálmasson [KR] og Daníel Hafsteinsson [FH] duttu út.

„Menn hafa sínar skoðanir sem er gott. Það er mitt, og okkar, að velja það lið sem við teljum að eigi rétt á sér. Það er ekki bara núna heldur líka upp á framtíðina að gera. Við erum að reyna búa til framtíð A-landsliðsins svo við tökum fulla ábyrgð á okkar ákvörðunum og erum pottþéttir á því að þetta séu réttar ákvarðanir.“

„Aðstæður fyrir þennan leik voru sérstakar. Það var þannig að U19 ára liðið okkar átti að fara út til Ítalíu og leika þar í milliriðli. Það datt upp fyrir sig og þá fjölgaði þeim leikmönnum sem við gátum valið verulega. Sem er gott og jákvætt að við getum tekið yngri strákana inn í hjá okkur. Báðir Valgeirarnir – ásamt öðrum – voru lengi vel inn í þessum 20 manna hóp hjá okkur. Svo er það þjálfarana að loka þeim hópi.“

Ísland mætir Svíþjóð á Víkingsvelli í undankeppni Evrópumóts landsliða 21 árs og yngri á Víkingsvelli á morgun. Ísland þarf sigur til að komast nær toppliðum riðilsins sem og að hleypa sænska liðinu ekki upp fyrir sig.

Leikurinn er í beinni útsendingu Stöðvar 2 Sport og hefst útsending þar klukkan 16:20.