Giannis valinn bestur annað árið í röð

Grikkinn Giannis Antetokounmpo – leikmaður Milwaukee Bucks - var valinn verðmætasti leikmaður NBA-deildarinnar í körfubolta annað árið í röð. Valið var tilkynnt fyrr í kvöld.

Hér er aðeins að ræða um hefðbundna deildarkeppni en Bucks duttu óvænt út úr úrslitakeppninni er liðið tapaði samtals 4-1 gegn Miami Heat. Giannis og félagar höfðu verið besta lið deildarinnar – bæði Austur og Vestur – á meðan deildarkeppninni stóð en þegar NBA-kúlan í Disney World hófst fór allt í baklás.

Liðið var með 56 sigra og 17 töp áður en úrslitakeppnin hófst.

Giannis er 11. leikmaðurinn sem er valinn bestur tvö ár í röð. Steph Curry gerði það síðast árin 2015 og 2016.

Giannis skoraði 29.5 stig að meðaltali í leik, tók 13.6 fráköst og gaf 5.6 stoðsendingar. Hann er því vel að þessu kominn en það er öruggt að Grikkinn er ekki sáttur fyrr en Bucks gerir atlögu að titlinum.