City fær Dias eftir tapið slæma í gær

Manchester City hefur náð samkomulagi við Benfica um kaup á varnarmanninum Rúben Dias. Portúgalska félagið fær 65 milljónir punda og kaupir Nicolas Otamendi í staðinn.

Manchester City tapaði illa fyrir Leicester í gær, 5-2, og ljóst að varnarleik liðsins má bæta. Dias er ætlað að gera það.

Dias er 23 ára gamall og hefur leikið 19 leiki fyrir A-landslið Portúgals sem og fyrir öll yngri landslið þjóðarinnar. Hann er uppalinn hjá Benfica og hefur leikið með aðalliði félagsins frá árinu 2017.

Benfica, sem greindi frá samkomulaginu við City seint í gærkvöld, greiðir 13,6 milljónir punda fyrir Otamendi.