Fauci kom ekkert á óvart að Trump smitaðist

Veikindi Donalds Trump Bandaríkjaforseta af völdum kórónuveirunnar komu Anthony Fauci, helsta sóttvarnasérfræðingi Bandaríkjastjórnar, ekki ögn á óvart eftir að hann sé Trump taka þátt í viðburði í Hvíta húsinu þar sem sóttvarnatilmæli voru virt að vettugi. Í viðtali lýsir Fauci hótunum sem hann og fjölskylda hans hafa fengið frá því að hann varð að andliti sóttvarnaaðgerða í landinu.

Trump greindist smitaður af kórónuveirunni 1. október og dvaldi í þrjár nætur á sjúkrahúsi þar sem hann fékk meðal annars tilraunalyf. Fjöldi starfsmanna Hvíta hússins og þingmanna repúblikana sýktust um sama leyti en margir þeirra höfðu verið viðstaddir viðburð í Hvíta húsinu viku fyrr þar sem Trump kynnti Amy Coney Barrett sem hæstaréttardómaraefni sitt. Fáir virtu sóttvarnareglur á viðburðinum.

Í viðtali við fréttaskýringarþáttinn 60 mínútur í gær var Fauci spurður hvort það hafi komið honum á óvart að Trump smitaðist.

„Alls ekki,“ svaraði Fauci.

„Ég óttaðist að hann ætti eftir að veikjast þegar ég sá hann í algerlega varhugarverðum aðstæðum í mannfjölda, enginn aðskilnaður á milli fólks og nánast enginn með grímu. Þegar ég sá það í sjónvarpinu sagði ég „Hamingjan hjálpi mér. Ekkert gott getur komið út úr þessu, þetta hlýtur að verða vandamál“ Og það var og, þetta reyndist vera ofurdreifaraviðburður,“ sagði Fauci sem er yfirmaður Ofnæmis- og smitsjúkdómastofnunar Bandaríkjanna.

Takmarka aðgang fjölmiðla að Fauci

Trump forseti hefur frá upphafi faraldursins reynt að gera sem minnst úr hættunni af honum og heldur því enn áfram þrátt fyrir að á þriðja hundrað þúsunds manns hafi nú látist í honum. Forsetinn hefur einnig markvisst grafið undan tilmælum eigin ríkisstjórnar um að fólk noti grímu og gæti að félagsforðun.

Sóttvarnasérfræðingar ríkisstjórnarinnar reyndu lengi vel að styggja ekki forsetann með því að bera til baka rangar fullyrðingar hans um faraldurinn, þar á meðal Fauci. Undanfarið hefur Fauci þó gengið ákveðnar fram og ekki veigrað sér við að andmæla forsetanum, meðal annars þegar framboð Trump sleit ummæli hans úr samhengi í kosningaauglýsingu.

„Ég lýsi ekki yfir stuðningi við neinn frambjóðanda, né mun ég nokkru sinni gera það. Hér er ég og þeir setja mig í miðja kosningaauglýsingu sem mér fannst svívirðilegt,“ segir Fauci í viðtalinu.

Trump sakaði Fauci í kjölfarið um að vera „demókrati“ þrátt fyrir að sóttvarnasérfræðingurinn hafi unnið að lýðheilsumálum í fimm áratugi og í stjórnartíð forseta úr báðum flokkum.

Viðurkennir Fauci fúslega að Hvíta húsið takmarki verulega viðtöl sem hann veitir fjölmiðlum. Það hafi hafnað óskum fjölmargra þátta sem óskuðu eftir að fá Fauci sem viðmælanda.

Fær „raunverulegar og trúverðugar“ hótanir

Áhersla Fauci á réttar upplýsingar um sóttvarnaaðgerðir hefur farið fyrir brjóstið á Trump forseta sem hefur ítrekað vegið að lækninum í ræðu og riti. Fauci hefur þannig orðið að grýlu margra þeirra sem amast gegn sóttvarnaaðgerðum yfirvalda í Bandaríkjunum.

Af þeim ástæðum hafa Fauci borist hótanir, þar á meðal líflátshótanir, og fjölskylda hans hefur verið áreitt. Lífverðir fylgja honum nú hvert fótmál.

„Það er dapurlegt, sú staðreynd að lýðheilsuskilaboð til að bjarga mannslífum skuli vekja slíkt hatur og andúð á mér að það leiðir til raunverulegra og trúverðugra hótana gegn lífi mínu og öryggi. Það truflar mig samt minna en að konan mín og börn séu áreitt,“ segir Fauci.