Dreymir um að safna fyrir nýrri hjólaskautahöll

Hér fyrir neðan má sjá nánari ýsingu á verkefninu

• Á Íslandi er ört vaxandi hópur sem stundar íþróttina hjólaskautaat (e. Roller Derby), háhraða-snertiíþrótt sem spiluð er á hjólaskautum. Fólk á öllum aldri stundar þessa íþrótt, en meirihluti iðkenda eru konur. Hjólaskautafélagið er fyrsta og eina íþróttafélag sinnar tegundar á Íslandi og er hluti af bæði ÍSÍ, ÍBR og WFTDA, með deildarlið og landslið sem margoft hafa keppt erlendis. Hingað til hefur félagið verið rekið á félagsgjöldum, sölu inn á leiki og fjáröflunum.
• ---
• Stefna okkar er að auka almenningsáhuga á grasrótaríþróttum, ásamt því að veita samastað fyrir breiðan hóp fólks, þá sérstaklega þeirra sem eru utanvelta í íþróttum. Menningin sem myndast hefur í íþróttinni, bæði erlendis og hér heima, er afar fjölbreytt, opin og skemmtileg. Nánari upplýsingar um íþróttina og félagið má sjá á vefsíðu okkar:
• ---
• Þar sem Hjólaskautafélagið hefur ekki haft aðgang að eigin húsnæði hingað til hefur það reitt sig á salaleigu hjá öðrum. Það er kostnaðarsamt og gerir það að verkum að æfingatímar eru óreglulegir og seint á kvöldin, þar sem íþróttafélög tengd bæjarfélögum ganga fyrir. Það kemur í veg fyrir að Hjólaskautafélagið geti kynnt skemmtilegan og fjölbreyttan heim hjólaskautanna fyrir almenningi, aftrar félaginu í að stækka og heftar getu þess til að bjóða upp á æskulýðsstarf.
• ---
• Hjólaskautafélagið hefur nú fengið samþykkt afnot af húsnæði í eigu Reykjavíkurborgar sem við höfum umráð yfir og býður það upp á fjölmörg tækifæri. Í okkar eigin húsnæði geta núverandi meðlimir haft stjórn á æfingartímum og það býður upp á að kynna almenningi, þá sérstaklega börnum og unglingum, fyrir hjólaskautum. Rík áhersla er á fjölbreytileika í íþróttinni: margir sem upplifa sig óvelkomna í öðrum íþróttum finna griðastað í hjólaskautaati og er því mikilvægt að við höfum umráð yfir okkar eigin umhverfi.
• ---
• Hjólaskautafélagið vill einnig veita öðrum jaðaríþróttum aðgang að húsnæðinu og búa til samfélag fyrir jaðaríþróttir sem hafa verið utanvelta og húsnæðislausar eins og við. Einnig verða haldnir opnir viðburðir eins og hjólaskautadiskó og annað kynningar- og félagsstarf.
• ---
• Til að láta markmið okkar ganga þurfa töluverðar endurbætur á húsnæðinu að eiga sér stað. Að lágmarki þarf að loka yfir verkstæðisgryfju og flota og merkja gólf í sal fyrir braut. Breytingar þyrfti að gera í kringum votkjarna/búningsaðstöðu til að stækka og tvískipta búningsklefa og bæta við snyrtingum, þar af einni aðgengilegri fyrir hjólastólanotendur. Til staðar er skiptiklefi með einni sturtu og einni snyrtingu en mögulega er þörf á breytingum ef halda á opna viðburði. Munum við leitast við að tryggja aðgengi fyrir alla.
• ---
• Stærsti kostnaðarliður verkefnisins eru framkvæmdir á gólfi. Samkvæmt grófri kostnaðaráætlun sem félagið hefur gert mun undirvinna gólfs, flotun og yfirborðsmeðhöndlun þess kosta um 2.5 milljónir. Með öllum kostnaðarliðum innifölnum er heildarupphæð framkvæmda 5 milljónir. Nánari útlistun á kostnaði er eftirfarandi:
• ---
• Nýtt gólf: 2,500,000
  
  
• Aðrar endurbætur í sal: 350,000
• Endurbætur á snyrtingum: 600,000
  
  
• Aðkeypt vinna og eftirlit: 600,000
• Ný tæki og munir: 150,000
  
  
• Hljóðkerfi og ljósabúnaður: 300,000
• Annað og ófyrirséð: 500,000
  
  
• Samtals: 5,000,000
• ---
• Þegar framkvæmdum er lokið getur Hjólaskautafélagið opnað jaðaríþrótta- og menningasetur sem mun nýtast félaginu sem og almenningi. Við vonum innilega að þið sjáið sömu tækifæri í þessu húsnæði og Hjólaskautafélagið gerir og veitið okkur styrk til að láta drauma okkar rætast.