Gerwyn Price heimsmeistari í fyrsta sinn

Úrslitaleiksins var beðið með mikilli eftirvæntingu enda höfðu báðir leikmenn spilað frábærlega á mótinu þegar kom að úrslitaleiknum.

Skoski reynsluboltinn Gary Anderson vann fyrsta settið en í kjölfarið fór Gerwyn Price á mikið flug og vann sex sett í röð en alls þarf að vinna sjö sett í úrslitaeinvíginu.

Taugarnar voru þandar hjá Price og hann klúðraði góðum tækifærum til að tryggja sér heimsmeistaratitilinn. Gary Anderson, sem oft hefur spilað betur, minnti á sig og vann tvö sett en í tíunda settinu hafðist það loks hjá Walesverjanum Gerwyn Price og fagnar hann þar með sínum fyrsta heimsmeistaratitli.