Lögreglan hafnaði boðum um aðstoð

Báðum boðum var hafnað.

Skömmu eftir að seinna boðinu var hafnað höfðu óeirðarseggir brotið sér leið inn í þinghúsið með því markmiði að stöðva staðfestingu úrslita forsetakosninganna í nóvember og ráfuðu þeir þar um, frömdu skemmdarverk og stálu jafnvel heilum húsgögnum.

Eins og bent er á í frétt AP fréttaveitunnar höfðu mótmælendurnir undirbúið mótmælin opinberlega á samfélagsmiðlum og margir þeirra höfðu sagst ætla að ráðast á þinghúsið.

Fjórir mótmælendur dóu, þar af einn sem var skotinn til bana af löggæslumanni, og einn lögregluþjónn lést af sárum sem hann er sagður hafa hlotið í átökum við óeirðaseggi.

Hér má sjá samantekt Washington Post þar sem farið er yfir aðdraganda óeirðanna og hvernig svo gat farið.

Óeirðirnar og það hvernig lögreglan tapaði stjórn þinghússins hefur vakið spurningar um öryggi á svæðinu og sömuleiðis um það hvernig tekið var á stuðningsmönnum Trumps, samanborið við það hvernig viðbrögðum þeldökkir mótmælendur hafa fengið frá yfirvöldum í Bandaríkjunum.

Óeirðarseggirnir fengu að ráfa um þingið í margar klukkustundir áður en lögreglan, með aðstoð annarra embætta, náði aftur tökum á þinghúsinu. Þá voru einungis þrettán óeirðaseggir handteknir, þó mun fleiri hafi verið handteknir síðan þá.

Í samtali við Washington Post spyr öldungadeildarþingmaðurin Lindsey Graham hvernig ástandið hefði orðið svona.

„Þeir hefðu getað sprengt bygginguna upp. Þeir hefðu getað drepið okkur öllu,“ sagði Graham.

Steven A. Sund, yfirmaður lögreglu þingsins, sagði í gær að lögreglan hefði undirbúið sig fyrir mótmæli. Í staðinn hefðu lögregluþjónar staðið frammi fyrir glæpsamlegum óeirðum. Yfirmaður félags lögregluþjóna þingsins segir þó að yfirmenn lögreglunnar hafi klúðrað undirbúningi og því hafi lögregluþjónar verið bornir ofurliði.

Sund hefur nú sagt af sér vegna þrýstings frá þingmönnum og sömuleiðis hafa öryggisstjórar beggja deilda þingsins sagt af sér vegna óeirðanna.

Þingmenn og fjölmargir aðrir hafa kallað eftir því að Trump verði komið frá völdum, áður en hann lætur af embætti þann 20. janúar. Hefur hann verið sakaður um að valda óeirðunum með áróðri sínum um forsetakosningarnar og ásökunum um að svindlað hafi verið á honum.

Skömmu fyrir óeirðirnar hélt Trump baráttufund þar sem hann hvatti stuðningsmenn sína til að sækja að þinghúsinu. Á fundinum fóru hann og bandamenn hans hörðum orðum um þingmenn og kosningarnar sem þeir voru að staðfesta.

Nancy Pelosi, forseti fulltrúadeildarinnar, hefur kallað eftir því að Mike Pence, varaforseti, beiti 25. ákvæði stjórnarskrár Bandaríkjanna. Það ákvæði segir til um að sé forseti Bandaríkjanna ófær um að sinna skyldum sínum taki varaforsetinn við.

Pelosi sagði Pence að grípa fljótt til aðgerða, annars myndu Demókratar kæra hann aftur fyrir embættisbrot.

„Í gær hvatti forseti Bandaríkjanna til vopnaðrar árásar gegn Bandaríkjunum. Vanhelgunin á þinghúsi Bandaríkjanna, sem er hof bandarísks lýðræðis, og ofbeldið sem beint var að þinginu er hryllingur sem mun héðan af flekka sögu þessa lands. [Ofbeldi sem] forseti Bandaríkjanna hvatti til,“ sagði Pelosi á blaðamannafundi sem hún hélt í gær.