Málflutningur gegn Trump hefst 8. febrúar

Trump var ákærðurð fyrir embættisbrot vegna aðkomu hans að árásinni á þinghúsið þann 6. janúar. Stuðningsmenn Trumps ruddu sér þá leið inn í þinghúsið með því markmiði að stöðva formlega staðfestingu niðurstaðna forsetakosninganna í nóvember, sem Trump tapaði og Joe Biden vann.

Trump var ákærður þann 13. janúar, þegar meirihluti þingmanna í fulltrúadeild Bandaríkjaþings greiddu atkvæði með því að ákæra forsetann. Alls greiddu 232 þingmenn atkvæði með ákærunni, þar af tíu Repúblikanar, og 197 gegn henni.

Hann er í raun ákærður fyrir að hvetja til uppreisnar og snýr sérstaklega að hlutverki forsetans í því að æsa fólkið upp. Fimm manns dóu vegna árásarinnar. Þar á meðal lögregluþjónn sem sagður er hafa fengið slökkvitæki í höfuðið og kona sem skotin var af löggæslumanni þegar hún var að reyna að brjóta sér leið inn í þingsal, þar sem vopnaðir menn stóðu vörð.

Trump er fyrsti forsetinn í sögu Bandaríkjanna sem er ákærður tvisvar fyrir embættisbrot.

Chuck Schumer, leiðtogi Demókrata í öldungadeildinni, fór í gærkvöldi yfir það hvernig réttarhöldin færu fram. Þau munu tæknilega séð hefjast á mánudaginn þegar Nancy Pelosi, forseti fulltrúadeildarinnar, sendir ákærurnar til öldungadeildarinnar, en málflutningurinn fer ekki fram fyrr en þann 8. febrúar.

Byggir þessi niðurstaða á samkomulagi við Repúblikana, sem vildu að Trump fengi meiri tíma til að undirbúa vörn sína, samkvæmt AP fréttaveitunni. Í frétt fréttaveitunnar segir þó að þingmenn Repúblikanaflokksins vilji einnig að lengri tími líði á milli árásarinnar og réttarhaldanna svo áhrif hennar dvíni.

Þetta er einnig í fyrsta sinn sem réttað verður yfir forseta vegna meintra embættisbrota, eftir að hann lætur af embætti. Repúblikanar hafa mótmælt réttarhöldunum á þeim grundvelli að þær séu tilgangslausar og fari jafnvel gegn stjórnarskrá Bandaríkjanna.

Demókratar segja þó að Trump verði að bera ábyrgð á árásinni á þinghúsið og sömuleiðis verði að koma í veg fyrir að hann geti boðið sig fram til embættis

Til að sakfella Trump þyrftu tveir þriðju öldungadeildarþingmanna að greiða atkvæði með sakfellingu. Í kjölfar þess væri svo hægt að halda aðra atkvæðagreiðslu til að meina Trump að bjóða sig aftur fram til embættis. Það þyrfti einfaldur meirihluti að samþykkja.

Í aðdraganda árásarinnar hélt Trump baráttufund við Hvíta húsið. Hann hefur um mánaða skeið haldið því fram að umfangsmikið kosningasvindl hafi kostað hann sigur og hefur hann í raun ekki enn viðurkennt ósigur, þó hann hafi látið af embætti.

Engar vísbendingar um slíkt svindl hafa litið dagsins ljós. Trump og bandamenn hans hafa tapað tugum dómsmála eða dómarar hafnað þeim, og rannsóknir og endurtalningar hafa ekki leitt neitt í ljós.

„Við munum aldrei gefast upp. Við munum aldrei viðurkenna ósigur. Það gerist ekki. Þú viðurkennir ekki ósigur vegna þjófnaðar,“ sagði Trump á baráttufundinum. „Við unnum þessar kosningar og við unnum þær með yfirburðum. Þetta voru ekki jafnar kosningar.“

Hann gagnrýndi þingmenn harðlega fyrir að ætla að staðfesta niðurstöður kosninganna og hvatti fólk til að fara til þinghússins og mótmæla.