Versta frammistaðan á móti Evrópuþjóðum á stórmóti í 43 ár

Óskar Ófeigur Jónsson skrifar 25. janúar 2021 11:46

Landsliðsþjálfarinn Guðmundur Guðmundsson var líflegur á hliðarlínu íslenska liðsins á mótinu. EPA-EFE/Anne-Christine Poujoulat

Það eru liðin 43 ár síðan að íslenska handboltalandsliðið náði síðast engu út úr leikjum sínum á móti Evrópuþjóðum á stórmóti.

Strákarnir okkar mættu fjórum Evrópuþjóðum á heimsmeistaramótinu í Egyptalandi og töpuðu öllum leikjunum fjórum með tveggja marka mun.

Þetta er aðeins í þriðja sinn í sögu íslenska karlalandsliðsins á heimsmeistaramótinu í handbolta sem íslensku strákarnir fá ekkert út úr leikjum sínum á móti Evrópuþjóðum.

Íslenska karlalandsliðið í handbolta vann bara tvo leiki á HM í Egyptalandi og þeir voru báðir gegn Afríkuþjóðum. Leikirnir á móti Portúgal, Sviss, Frakkland og Noregi töpuðust.

Það þarf að fara alla leið aftur til HM í Danmörku 1978 til að finna stórmót þar sem íslenska landsliðið tapaði síðast öllum leikjum sínum á móti Evrópuþjóðum.

Íslenska liðið tapaði þá öllum þremur leikjum sínum líkt og á HM í Austur-Þýskalandi fjórum árum fyrr.

Á HM 1978 tapaði íslenska liðið á móti Sovétmönnum, Danmörku og Spáni og hefur verið talað um fjóra svarta daga í Danmörku þar sem heimsmeistarakeppnin fór fram.

Á HM 1974 tapaði íslenska landsliðið á móti Tékkóslóvakíu, Vestur-Þýskalandi og Danmörku en flensa herjaði á íslenska landsliðið á mótinu.

Slakt gengi á móti Evrópuþjóðum á heimsmeistaramótum er svo sem ekkert nýtt því íslenska karlalandsliðið hefur ekki unnið Evrópuþjóð á þremur af síðustu fjórum heimsmeistaramótum.

Núll prósent árangur á móti Evrópuþjóðum á stórmótum