Trump með nýja verjendur en óreiða einkennir undirbúninginn

Lögmaðurinn Karl S. Bowers Jr., sem stýrði teymi forsetans, og fjórir aðrir sem höfðu gengið til liðs við teymið, hættu skyndilega um helgina vegna deilna um vörn forsetans í hans öðrum réttarhöldum vegna ákærur fyrir embættisbrot, sem hefjast í öldungadeild Bandaríkjaþings þann 9. febrúar.

Fregnir fjölmiðla vestanhafs segja að þau hafi hætt vegna áherslu Trumps á að réttarhöldin snúist um innihaldslausar staðhæfingar hans um að umfangsmikið kosningasvindl hafi kostað hann sigur í forsetakosningunum í nóvember.

Það vildu Bowers og hinir ekki gera, heldur vildu þau nota þá vörn að það færi gegn stjórnarskrá Bandaríkjanna að rétta yfir embættismanni sem hefði látið af embætti.

Hið nýja teymi forsetans verður leitt af þeim David Schoen og Bruce L. Castor Jr. Í yfirlýsingu Trumps frá því í gærkvöldi er haft eftir Castor að stjórnarskrá Bandaríkjanna muni bera sigur úr býtum.

Castor er hvað þekktastur fyrir að hafa á árum áður ákveðið að ákæra Bill Cosby ekki fyrir kynferðisbrot og felldi niður mál gegn leikaranum alræmda árið 2005. Árið 2016 bar Castor vitni fyrir hönd Cosby og sagði að ekki ætti að saksækja leikarann á nýjan leik vegna samkomulags sem Castor gerði við Cosby árið 2005.

Schoen var nýverið lögmaður Roger Stone, vinar og bandamanns Trumps til langs tíma. Trump mildaði dóm Stones, sem hann hlaut fyrir að ljúga að Bandaríkjaþingi, að hindra framgang réttvísinnar og að reyna að hafa áhrif á vitnisburð annarra, í fyrra.

Politico segir Schoen hafa mikla reynslu af því að koma umdeildum aðilum til varnar. Þar á meðal aðilum viðloðnum skipulagða glæpastarfsemi.

Sá eini sem hefur verið ákærður tvisvar

Trump var ákærður fyrir embættisbrot öðru sinni þann 13. janúar, sjö dögum áður en hann lét af embætti. Hann er eini forseti Bandaríkjanna sem hefur verið ákærður fyrir embættisbrot tvisvar sinnum.

Trump er í raun ákærður fyrir að hvetja til uppreisnar og snýr sérstaklega að hlutverki forsetans í því að æsa fólk upp, sem á endanum braut sér leið inn í þinghús Bandaríkjanna þann 6. janúar, með því markmiði að stöðva formlega staðfestingu úrslita forsetakosninganna í nóvember.

Eftir að Trump og bandamenn hans í Repúblikanaflokknum, þar á meðal þingmenn á báðum deildum Bandaríkjaþings, staðhæfðu ítrekað og lengi yfir því að umfangsmikið kosningasvindl hefði kostað Trump sigur, stóðu stuðningsmenn hans í þeirri trú að svo væri og gera enn.

Engar vísbendingar hafa þó litið dagsins ljós um þetta umfangsmikla kosningasvindl og Trump-liðum hefur ítrekað mistekist að færa sönnur fyrir því fyrir dómstólum og víðar.

Sjá einnig: „Munið þennan dag að eilífu“

Trump hefur, samkvæmt AP fréttaveitunni, átt í basli með að verða sér út um lögmenn sem hafa viljað koma honum til varnar og hefur undirbúningur málsvarnar hans einkennst af óreiðu.

Verulega litlar líkur eru þó taldar á því að forsetinn fyrrverandi verði sakfelldur í öldungadeildinni. Repúblikanar séu ekki tilbúnir til að sakfella hann en tvo þriðju þingmanna öldungadeildarinnar, eða 67, þarf til sakfellingar. Deildin skiptist nú jafnt milli Demókrata- og Repúblikanaflokksins, 50-50.

Fræðimenn eru flestir sammála um að stjórnarskrá Bandaríkjanna meini ekki ákærur gegn embættismönnum sem hafi látið af embætti, samkvæmt frétt AP. Þar að auki komi fram í stjórnarskrám ríkja sem séu eldri en Bandaríkin sjálf að það sé réttlætanlegt og löglegt.