Rannsaka bakgrunn og eðli sambands Freyju og hins grunaða

Lögreglan reynir þá að varpa ljósi á og öðlast nánari skilning á eðli sambands þeirra.

Eiginmaður Freyju Egilsdóttur, sem fannst myrt á Jótlandi, játaði í morgun þegar hann var leiddur fyrir dómara að hafa orðið Freyju að bana. Hann hefur verið úrskurðaður í fjögurra vikna gæsluvarðhald. Freyja og hinn grunaði höfðu slitið samvistum.

Michael Kjeldgaard, yfirlögregluþjónn hjá lögreglunni á Austur Jótlandi sem fer með rannsókn málsins, segir í samtali við fréttastofu að lögreglan leggi mikið kapp á að safna sönnunargögnum áður en það verður um seinan.

Stórt verkefni fyrir höndum

„Rannsóknin er skammt á veg komin. Við höfum einungis fengið að rannsaka það í einn dag. Við vinnum hörðum höndum að því að safna öllum sönnunargögnum áður en það verður um seinan. Það geta verið líffræðileg gögn, tölvugögn og svo framvegis. Við erum með stórt verkefni fyrir höndum og leggjum alla áherslu á að komast áfram í rannsókninni. Það mun taka sinn tíma að fara í gegnum sönnunargögnin.“

Grunur beindist að manninum þegar hann hafði samband við lögreglu í gærmorgun og sagði að ekkert hefði spurst til Freyju síðan á fimmtudag og að hann hefði áhyggjur. Skömmu síðar var hann handtekinn.

„Lögreglan mat stöðuna sem svo að það hafi verið margt sem hafi hreinlega ekki gengið upp í frásögn mannsins. Við ákváðum strax á þeim tímapunkti að handtaka manninn og lýstum síðan eftir konunni í framhaldinu. Seinna, þegar við fundum konuna var manndrápsrannsókn sett af stað og í framhaldi af því var farið fram á gæsluvarðhald yfir manninum vegna gruns um manndráp,“ sagði Michael.

Aðspurður hvar líkið af Freyju hafi fundist sagðist Michael ekki geta farið út í nein smáatriði.

„Það eina sem ég get sagt á þessari stundu er að hin myrta fannst við eigin heimili. Við fundum líkamsleifar í húsinu og í garðinum fyrir utan húsið. Ég get ekki farið út í smáatriði vegna rannsóknarinnar sem er enn í gangi.“

Michael fékkst ekki til að segja hvort Freyja hefði einhvern tímann tilkynnt ofbeldi af hálfu mannsins til lögreglu.

„Meginþungi rannsóknarinnar núna er að kortleggja bakgrunn málsins; tilefni drápsins og að viða að okkur upplýsingum um bakgrunn mannsins. Að svo stöddu er rannsóknin of skammt á veg komin til að hægt sé að draga ályktanir um samband þeirra en það er auðvitað hluti af rannsókninni sem er í gangi.“

Málið hefur vakið mikinn óhug og hafa fjölmiðlar bæði á Íslandi og í Danmörku fjallað mikið um málið.

Þetta mál er með öllu hrottafengið. Er ekki óvanalegt fyrir lögregluna í Árósum að fást við svona mál?

„Jú, það er rétt. Þetta er mjög dýrslegt og harðneskjulegt morð. En þetta er samt ekki í fyrsta skipti, hér í Danmörku, sem svona mál kemur upp en það er rétt að þetta er sannarlega ekki daglegt brauð. Þetta er mjög sérstakt mál.“