Sara Björk meðal tuttugu bestu leik­manna ársins 2020 að mati virts knatt­spyrnu­tíma­rits

Alls hafði FourFourTwo samband við 27 íþróttablaðamenn víðs vegar um heim allan til að setja saman lista yfir tuttugu bestu knattspyrnukonur í heimi. Aðeins var haft samband við einn blaðamann frá hverju landi.

Var listinn svo birtur í nýjasta tölublaði tímaritsins. Þar var Sara Björk jöfn Denise O‘Sullivan frá Írlandi í 15. og 16. sæti listans.

„Ísland er ekki beint meðal þeirra þjóða sem við taldar eru bestar í heimi en (Sara Björk) Gunnarsdóttir hefur nú spilað með tveimur af stærstu liðum Evrópu. Hún skoraði í úrslitaleik Meistaradeildar Evrópu á síðasta ári og hjálpaði Lyon að landa sigri á fyrrum samherjum hennar í Wolfsburg,“ segir í umfjöllun FourFourTwo um Söru Björk.

„Gunnarsdóttir er með einstakan hæfileika til að finna pláss á miðju vallarins. Hreyfing hennar sem og hæfileiki til að taka við boltanum á þröngu svæði er til fyrirmyndar og sýnir hversu yfirveguð hin 30 ára gamla knattspyrnukona er,“ segir einnig í umfjölluninni.

Líkt og á lista The Guardian yfir 100 bestu knattspyrnukonur í heimi var það hin danska Pernille Harder sem var kosin besti leikmaður heims árið 2020. Harder er dýrasti leikmaður í sögu kvennaknattspyrnu en Chelsea festi kaup á leikmanninum í sumar. 

Þar áður lék hún með Söru Björk hjá Wolfsburg og náðu þær einkar vel saman.

Hér má sjá lista FourFourTwo í heild sinni.