Máli Eflingar gegn Mönnum í vinnu og Eldum rétt vísað frá

Ákvörðunin byggir meðal annars á því að búið var að taka MIV til gjaldþrotaskipta og fyrirtækið væri ekki til.

Hildur Leifsdóttir, lögmaður Eldum rétt, segir gott að niðurstaða sé komin í málið, sem hafi tekið á alla hlutaðeigandi.

Sögðu frádrátt ólögmætan og aðstæður slæmar

Efling stefndi Eldum rétt og starfsmannaleigunnar MIV fyrir hönd fjögurra rúmenskra verkamanna árið 2019. Málið snerist um frádrátt af launum verkamannanna og aðstæður þeirra.

Starfsmannaleigan dró frá launum verkamannanna fyrirframgreidd laun og útlagðan kostnað og hélt Efling því fram að það hefði verið ólögmætt.

Sjá einnig: Efling telur engan vafa á að Eldum rétt beri að axla keðjuábyrgð

Menn í vinnu var tekið til gjaldþrotaskipta sem luku í september 2019. Það var í kjölfars fjölmiðlaumfjöllunar um slæman aðbúnað erlends verkafólks hér á landi þar sem fjallað var um Menn í vinnu.

Eldum rétt réði verkamennina fjóra frá MIV yfir tímabilið 9. janúar til 8. febrúar. Einn vann þó til 30. janúar.

Sjá einnig: Eldum rétt taldi sig breyta rétt

Í dómi Héraðsdóms Reykjavíkur segir að verkamennirnir hafi skrifað undir ráðningarsamning þar sem fram kom að hægt væri að draga frá launum þeirra kostnað MIV vegna flugmiða til Íslands, ógreidda leigu og annað. Þeir samningar voru yfirfarnir af Vinnumálastofnun og samþykktir athugasemdalaust.

Stærstu frádráttarliðirnir vörðuðu ferðakostnað, fyrirframgreiðslur, bætur vegna ólögmætra uppsagna og leigugreiðslur.

Í dómnum segir að skýringar verkamannanna séu bæði ótrúverðugar og stangist á við gögn málsins, sem hafi meðal annars komið frá þeim sjálfum. Þau staðfestu öll að MIV hefðu greitt ferðakostnað þeirra til landsins og þá sögðust tveir kannast við að hafa fengið fyrirframgreiðslur í seðlum.

Aðrir töldu innborgarnir á bankayfirlitum hafa verið frá maka eða örum aðila, eða vera endurgreiðoslu á kostnaði sem þeir hefðu sjálfir lagt út fyrir MIV, þrátt fyrir að hafa áður sagst algerlega peningalausir við komuna til Íslands, eins og segir í dómnum.

Sjá einnig: Segir það einlægan vilja að standa undir keðjuábyrgð

Alvarlegar ásakanir um aðbúnað ekki í takt við lýsingar

Þegar kemur að aðbúnaði verkamannanna segir í dómnum að ásakanir Eflingar og verkamannanna sjálfra hafi verið á reyki. Þrátt fyrir að ásakanirnar fólksins og starfsmanns Eflingar um ástand hússins sem þau bjuggu hafi verið mjög alvarlegar hafi ekki verið óskað eftir úttekt á húsinu, né kallað eftir lögreglurannsókn.

Miðað við ásakanirnar hafi verið nægt tilefni til þess.

Sömuleiðis hafi engin tilraun verið gerð til að leggja fram nafnalista yfir aðra sem hafi átt að vera í húsnæðinu né önnur gögn.

Fólkið bjó í húsnæði við Dalveg í Kópavogi og sögðu þau aðstæður þeirra hafa verið ómannúðlegar. Meðal annars sögðu þau Sex til átta manns hafi verið saman í herbergi og að einungis eitt klósett hafi verið fyrir tuttugu manns. Frásagnir þeirra varðandi fjölda herbergja og íbúa voru þó nokkuð á reyki.

Í stefnu Eflingar segir að sex til átta hafi búið í hverju herbergi en það kom hvergi fram í lýsingum verkamannanna.

Milljón á mann í málskostnað

Að endingu segir í dómnum að stefnendur verði að greiða málskostnað málsins og teljist hann milljón krónur til Eldum rétt og svo þrjár milljónir til þriggja starfsmanna MIV sem stefnt var. Í heildina fjórar milljónir.