Innlent

Meintir gerendur í tveimur andlátsmálum tengjast

Heimir Már Pétursson skrifar
Lögreglan reiknar með að mál hennar vegna morðsins í Rauðagerði verði sent ákærusviði eftir um tvær vikur. Þar verður síðan tekin ákvörðun um ákæru eða ákærur.
Lögreglan reiknar með að mál hennar vegna morðsins í Rauðagerði verði sent ákærusviði eftir um tvær vikur. Þar verður síðan tekin ákvörðun um ákæru eða ákærur. Vísir

Tengsl eru á milli mannsins sem játað hefur að hafa orðið manni að bana í Rauðagerði og manns sem nú sætir gæsluvarðhaldi vegna dauða manns í Kópavogi á föstudag. Lögregla telur málin þó ekki tengjast. Farbann verður ekki framlengt yfir tveimur mönnum sem hafa stöðu sakbornings í rauðagerðismálinu.

Margeir Sveinsson yfirlögregluþjónn hjá miðlægri deild Lögreglunnar á höfuðborgarsvæðinu segir ekki liggja fyrir hvort maðurinn sem lést í Kópavogi á föstudag lést vegna áverka sem honum voru veittir líkamlega af öðrum manni eða vegna þess að ekið var á hann.

Margeir Sveinsson yfirlögregluþjónn staðfestir að maður sem nú sætir gæsluvarðhaldi vegna dauða manns í Kópavogi og maðurinn sem játað hefur á sig morðið í Rauðagerði hafi tengst.Vísir/Egill

„Það er eitt af því sem við erum að skoða. Við erum meðal annars að bíða eftir niðurstöðum frá réttarmeinafræðingi og fleiri gögnum. Vettvangsrannsókn og fleira,“ segir Margeir.

Þrír voru hansteknir vegna málsins en tveimur sleppt fljótlega. Margeir vill ekki ræða hvort sá sem enn er í haldi hafi gengist við því að eiga hlut að máli. Nú sé meðal annars unnið að öflun og skoðun gagna úr símum og öryggismyndavélum. Það liggi hins vegar fyrir maðurinn og hinn látni hafi verið í einhverjum samskiptum áður en hann lést.

Þá vekur athygli að tengsl eru á milli mannsins sem er í haldi vegna andlátsins í Kópavogi og mannsins sem hefur játað á sig morðið í Rauðagerði.

„Það er það sama þar. Þeir höfðu verið í einhverjum samskiptum áður, já.“

Er talið að þeir hafi tekið þátt í einhverri starfsemi saman?

„Ég get ekkert sagt til um það.“

Báðir af sama þjóðerni?

„Nei,“ segir Margeir.

Engu að síður er athyglivert að meintir gerendur í tveimur andlátsmálum á stuttum tíma tengist?

„Ísland er nú ekki stórt og fjölmennt. Þannig að það getur alveg átt sér stað og hefur eflaust gerst í öðrum málum. Ég veit það ekki. En ég get ekki farið út í það sérstaklega.“

Er það einn þátturinn í málinu sem þið eruð að skoða?

„Ekkert sérstaklega, nei.“

Þannig að það vekur ekki sérstaka athygli ykkar að þeir hafi tengst?

„Nei ekki í tengslum við þessi mál sem hafa verið til skoðunar. Bæði í Rauðagerði og þarna í Kópavogi, nei,“ segir Margeir.

Hann reiknar með að rauðagerðismálið fari til ákærusviðs eftir um tvær vikur. Manndrápið sjálft sé upplýst en enn sé verið að rannsaka aðra þætti málsins.

Fjórtán hafa stöðu sakbornings í rauðagerðismálinu að þeim meðtöldum sem hefur játað á sig morðið og þarf af hafa sjö sætt farbanni. Tveir þeirra voru yfirheyrðir fyrir dómi í morgun og verður ekki óskað eftir framlengingu á farbanni yfir þeim þegar það rennur út á föstudag. Margeir segir yfirheyrslum yfir þeim lokið en þeir hafi þó enn stöðu grunaðara.

Morð í Rauðagerði Lögreglumál Kópavogur Mannslát í Vindakór

Tengdar fréttir

Málið harmleikur og ömurlegt í alla staði

Verjandi manns sem situr í gæsluvarðhaldi vegna gruns um aðild að andláti manns í Kópavogi um helgina á síður von á því að gæsluvarðhaldsúrskurðinum verði áfrýjað til Landsréttar. Hann segir skjólstæðing sinn enn halda því fram að um slys hafi verið að ræða og lýsir málinu sem harmleik.

Sam­skipta­gögn úr síma hins látna leiddu til hand­töku mannanna

Símasamskipti sem lögregla fann í síma mannsins sem lést í Kórahverfi í Kópavogi um helgina leiddu til þess að þrír Rúmenar voru handteknir vegna málsins. Tveimur þeirra hefur nú verið sleppt en sá þriðji sætir gæsluvarðhaldi. Meðal þess sem lögregla rannsakar nú er hvort einhver vitni hafi orðið að atvikinu.

Mest lesið


Fleiri fréttir

Sjá meira


×

Mest lesið