Bush sakar flokk sinn um ein­angrunar­hyggju og and­úð á inn­flytj­endum

Bush var forseti Bandaríkjanna frá 2001 til 2009 á tíma en hann hafði áður verði ríkisstjóri í Texas þar sem margir íbúar eru innflytjendur, sérstaklega af rómansk-amerískum ættum. Í tíð Bush reyndu repúblikanar að höfða til rómansk-amerískra kjósenda en síðan þá hefur Repúblikanaflokkurinn aðhyllst vaxandi harðlínustefnu í innflytjendamálum.

Í viðtali við NBC-sjónvarpsstöðina í síðustu viku lýsti Bush áhyggjum af þróun flokksins. „Þetta er fallegt land sem við eigum en það er ekki fallegt þegar við fordæmum, uppnefnum fólk og ölum á ótta fólks við innflytjendur,“ sagði fyrrverandi forsetinn í viðtalinu.

Nefndi hann þó ekki Donald Trump, fyrrverandi forseta, á nafn en ríkisstjórn hans takmarkaði möguleika útlendinga á að koma til Bandaríkjanna, hvort sem er löglega eða ólöglega. Eitt helsta stefnumál Trump var að reisa múr á landamærum Bandaríkjanna og Mexíkó til að loka landinu fyrir innflytjendum frá Mið- og Suður-Ameríku.

Hópur repúblikana í fulltrúadeild Bandaríkjaþings íhugar nú að stofna sérstakan þingflokk utan um slagorð Trump um „Bandaríkin fyrst“. Þau áform virðast byggjast á útlendingafælni að hluta til. Í gögnum um stofnun þingflokksins var talað um að halda á lofti „engilsaxneskum stjórnmálahefðum“ og varað við því að innflytjendur ógnuðu „einstakri sjálfsmynd“ Bandaríkjanna.

Þegar Bush var beðinn um að lýsa flokknum sínum í viðtalinu vafðist honum ekki tunga um tönn. „Ég myndi lýsa honum með einangrunarhyggju, verndarstefnu og að vissu leyti útilokandi þjóðernishyggju,“ sagði hann.

Gerði Bush þó lítið úr eigin afstöðu. „Þetta er ekki beinlínis mín hugsjón sem gamals karls, en ég er bara gamall karl sem er búið að koma í helgan stein.“

Vill ekki kenna neinum um árásina á þinghúsið

Margir kjörnir fulltrúar Repúblikanaflokksins tóku undir stoðlausar samsæriskenningar Trump fyrrverandi forseta um að stórfelld svik hefðu kostað hann sigurinn í forsetakosningunum síðasta haust. Þeir órar urðu hópi stuðningsmanna Trump hvatning til að ráðast inn í þinghúsið 6. janúar.

Jafnvel eftir að þingmenn beggja flokka þurftu að yfirgefa þingsal og fela sig inni á skrifstofum og undir borðum fyrir æstum múgi sem talaði meðal annars um að hengja Mike Pence varaforseta greiddi meirihluti fulltrúadeildarþingmanna repúblikana atkvæði gegn því að staðfesta úrslit forsetakosninganna.

Bush sagði að sér hefði boðið við árásinni á þinghúsið. Hún hafi verið hræðilegur hluti af sögu Bandaríkjanna. Sjálfur vildi hann þó ekki kenna neinum um hvernig fór þennan dag.

„Sagan mun fella sinn dóm eftir því sem tíminn líður. Það munu frekari upplýsingar koma fram. En eitt er víst að þetta er bara dapurlegur kafli, dapurlegt augnablik, virkilega dapurlegt,“ sagði Bush.