Strangar reglur fyrir keppendur en fjöldi áhorfenda á The Open

Jon Rahm, sigurvegari Opna bandaríska, Brooks Koepka sem unnið hefur fjögur risamót, Xander Schauffele og Jordan Spieth, sem vann The Open árið 2017, eru meðal þeirra sem þykja sigurstranglegastir á mótinu í ár. Írinn Shane Lowry hefur haft titil að verja í tvö ár.

Dagana sem mótið stendur yfir mega þessir kylfingar og aðrir aðeins vera á Royal St George‘s golfvellinum, sem er í Sandwich á Englandi, eða lokaðir inni á hóteli sínu. Þeir geta ekki skroppið í búð, á veitingastað eða annað.

Hver keppandi má skilgreina að hámarki þrjá aðila sem hann má eiga samskipti við á meðan á mótinu stendur. Í þessum hópi þurfa að vera kylfuberar, sjúkraþjálfarar, læknar eða aðrir sem kylfingar vilja hafa sér til aðstoðar. Allir í hópnum þurfa að fylgja sömu sóttvarnareglum og kylfingarnir.

Kylfingarnir hætti ekki á að koma öðrum í vanda

Kylfingarnir þurftu að sýna fram á neikvætt Covid-sýni sem ekki mátti vera eldra en þriggja daga, burtséð frá því hvort þeir væru bólusettir. Þeir þurftu einnig að taka smitpróf við komuna á golfvöllinn. Þá skulu þeir bera grímu hvar sem þeir fara innanhúss.

Keppendur geta verið dæmdir úr leik ef þeir brjóta þessar reglur og einnig ef að manneskja sem þeir hafa umgengist greinist með veiruna. Engu máli skiptir þó að þeir taki nýtt próf sem sýni neikvæða niðurstöðu.

„Ég held að keppendur viti hver áhættan er. Þeir þurfa allir að bera ábyrgð. Þeir vilja ekki hætta á að koma öðrum kylfingum í vanda. Ég lít á þá sem fagmenn hvað þetta varðar,“ sagði Martin Slumbers, framkvæmdastjóri R&A sem skipuleggur mótið.

Áhorfendamet frá því að faraldurinn hófst

Engu að síður verða 32.000 áhorfendur leyfðir á hverjum keppnisdegi, eða 80% af venjulegum hámarksfjölda. Áhorfendafjöldinn verður því meiri en á nokkru golfmóti frá því að faraldurinn hófst, samkvæmt ESPN.

„Við höfum unnið stíft að þessu með stjórnvöldum. Við vitum upp á hár í hvaða umhverfi við þurfum að vinna. Það verða mjög strangar kröfur fyrir áhorfendur og þeir verða ekki eins nálægt kylfingum og vaninn er,“ sagði Slumbers en bætti við að það væri einfaldlega ómissandi hluti af The Open að sigurvegarinn lyki keppni fyrir framan áhorfendur á sunnudaginn.

The Open verður í beinni útsendingu á Stöð 2 Golf alla keppnisdagana og hefst útsending snemma í fyrramálið eða klukkan 5:30. Útsendingartíma má sjá hér.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.