Brunaútsala hjá Barcelona

Barcelona á í miklum fjárhagskröggum og þarf að losa leikmenn af launaskrá, meðal annars til þess að geta skráð nýja leikmenn til leiks. Barcelona ku vera fjörutíu prósent yfir launaþaki spænsku úrvalsdeildarinnar.

Samkvæmt spænska dagblaðinu Sport er Lenglet, Dest og Umtiti til sölu og þeir gætu yfirgefið Barcelona á næstu dögum ef réttu tilboðin berast.

Talsverður áhugi er á þremenningunum, sérstaklega Lenglet og Dest, meðal annars frá Englandi og Ítalíu. Frakkarnir Antoine Griezmann og Ousmane Dembélé gætu einnig verið á förum frá Barcelona.

Eins og frá var greint í síðustu viku mun Lionel Messi framlengja samning sinn við Barcelona. Hann tekur á sig fimmtíu prósenta launalækkun en fær fimm ára samning.

Barcelona endaði í 3. sæti spænsku úrvalsdeildarinnar á síðasta tímabili en varð bikarmeistari.