Sárnar meðhöndlun Barcelona á hans málum: „Ég er ekki heimskur“

Emerson var keyptur til bæði Barcelona og Real Betis frá Atlético Mineiro í Brasilíu árið 2019. Hann spilaði með Betis fram til ársins í ár en Barcelona átti rétt á að kaupa hann. Félagið borgaði Betis níu milljónir evra fyrir hann í sumar.

Hann spilaði fyrstu þrjá deildarleiki liðsins á leiktíðinni, en Barcelona er með sjö stig eftir fyrstu þrjá leikina jafnt fimm öðrum liðum á toppi spænsku úrvalsdeildarinnar. Emerson var svo óvænt seldur til Tottenham seint á lokadegi félagsskiptagluggans fyrir 25 milljónir evra.

Barcelona græddi þar 16 milljónir evra eftir kaupin fyrr í sumar en félagið er skuldum vafið, líkt og fjallað hefur verið um í sumar. Emerson dreymdi um að spila fyrir félagið og sárnar að hafa farið.

„Mér sárnaði meðhöndlun Barca á mér. Það er ljóst að þegar þeir keyptu mig hugsuðu þeir um að selja mig. Ég sagði þeim ítrekað að draumur minn væri að spila hér, en ég er ekki heimskur. Þeir sögðu falleg orð, en vildu mig burt. Ég fór vegna þess að ég vildi ekki áfram og vera leiður hjá félagi sem ég elskaði,“ hefur spænski miðillinn Marca eftir Emerson.

Emerson kemur til með að veita Íranum Matt Doherty samkeppni um hægri bakvarðarstöðuna hjá Tottenham. Serge Aurier var leystur undan samningi hjá félaginu samhliða því sem Emerson var keyptur.

Hann gæti spilað sinn fyrsta leik þegar Tottenham mætir Crystal Palace 11. september næst komandi. Tottenham er á toppi ensku úrvalsdeildarinnar með fullt hús stiga eftir þrjá 1-0 sigra í upphafi móts.