„Þetta var íslenskur karakter, eitthvað sem við höfum alltaf haft“

„Þetta sýnir að fótboltinn er stundum óútreiknanlegur. Við byrjuðum leikinn frábærlega á fyrstu mínútu en svo slökknaði á okkur í 64 mínútur, það er engin afsökun fyrir því. Við vorum langt frá mönnum, það var lítið tempó, vorum ekki að skila sendingum á réttan stað og vorum ekki að verjast nægilega vel, fáum á okkur mark úr horni. Þetta var ekki gott og ég tek það algjörlega á mig,“ sagði Arnar Þór við RÚV að leik loknum.

„Það sem var gott í þessu var að sjá að þeir drengir sem komu inn á – og orkan sem þeir komu með – þessi jákvæði fótbolti sem við viljum koma inn í liði hægt og sígandi var yndislegt. Þetta var algjör rússibani síðustu 20 mínúturnar. Það var gott móralslega séð fyrir þennan hóp að fá þetta stig. Hefði verið rosalega erfitt að labba út úr þessum leik með 90 mínútur eins og fyrstu 64 mínúturnar voru hér í kvöld.“

„Þetta var íslenskur karakter, það er ósköp einfalt. Þetta er eitthvað sem við höfum alltaf haft. Þessi orka – sem ég nefndi – er líka bara karakter. Að þora að koma og spila jákvæðan fótbolta, senda fram á við, pressa, sækja færi og sækja mörk. Við sóttum á mjög mörgum mönnum síðustu 20 mínútur leiksins, vorum líka rosalega fljótir til baka. Brynjar Ingi (Bjarnason) ver á línu til að mynda. Orkan í liðinu, og allt tempó, var allt annað síðustu 25 mínúturnar miðað við fyrstu 65 mínúturnar,“ sagði Arnar Þór um endurkomu Íslands í kvöld.

„Hann kemur inn á skorar, ég vil samt ekki neitt af Þóri Jóhanni Helgasyni, Jóni Degi Þorsteinssyni, Arnóri Sigurðssyni eða Ara Frey Skualsni. Þeir komu allir mjög vel inn í leikinn og allir fimm hjálpuðu þeim sem voru fyrir inn á að breyta þessum leik. Andir Lucas – eða einhver annar – allir þessir drengir eiga framtíðina fyrir sér. Það er virkilega erfitt að tengja saman leiki á þessum aldri. Það er líka erfitt að láta unga leikmenn spila 90 mínútur tvisvar til þrisvar á svona stuttum tíma. Þetta tekur á líkamlega. Þurfum að vera skynsöm og verja þá. Þurfum að taka skrefin á réttum tíma svo þeir verði á endanum tilbúnir fyrir A-landsliðið,“ sagði Arnar Þór um Andra Lucas Guðjohnsen en hann kom inn af bekknum og skoraði jöfnunarmark Íslands.

„Siggi (Sigurður Sveinn Þórðarson), liðstjórinn okkar, hefur ákveðið það. Ég hef engan tíma til að pæla í því,“ sagði Arnar um þá ákvörðun að láta Andra Lucas bera númerið 22 líkt og faðir hans gerði undir lokin með íslenska landsliðinu.

„Við vitum alveg að fyrir þessa drengi er ekkert auðvelt að bera þetta nafn. Þeir eru geggjaðir báðir tveir og ég veit að sá þriðji er á leiðinni,“ sagði þjálfarinn um Svein Andra og Andra Lucas Guðjohnsen.

„Ég er bara ekki byrjaður að pæla í Þjóðverjunum. Síðasta vika er búin að vera rússíbani. Við setjumst niður í kvöld og leikgreinum okkar leik fyrst, skoðum svo tvo leiki undir stjórn nýs þjálfara Þýskalands á morgun,“ sagði Arnar Þór að endingu.