Sout­hgate ver á­kvörðun sína

Harry Kane kom Englandi yfir með þrumuskoti lengst utan af velli þegar 18 mínútur voru til leiksloka. Leit út fyrir að það yrði sigurmark leiksins en Damian Szymanski var á öðru máli en skalli hans á 92. mínútu jafnaði metin í 1-1 og reyndust það lokatölur.

Athygli vakti að Southgate ákvað að gera enga skiptingu í leiknum þrátt fyrir að eiga menn á borð við Reece James, Jordan Henderson, Trent Alexander-Arnold, Jude Bellingham og Jesse Lingard á bekknum.

Southgate stillti raunar upp sama liði og vann Ungverjaland í fyrsta leik þessa landsliðsglugga en hann gerði svo 11 breytingar á byrjunarliði sínu fyrir leikinn gegn Andorra á dögunum. Báðir unnust þeir 4-0.

„Okkur leið vel inn á vellinum og stjórnuðum leiknum frá A til Ö svo við hefðum verið að gera skiptingar aðeins til að gera skiptingar og það hefði getað truflað ryðmann sem við vorum í,“ sagði Southgate í viðtali eftir leik.

„Ég geri mér grein fyrir að fólk mun spyrja sig út í þessa ákvörðun en við töldum ekki þörf á því (að gera skiptingar).“

England er á toppi I-riðils með 16 stig eftir sex leiki. Þar á eftir kemur Albanía með 12 og Pólland er í þriðja sæti með 11 stig.