Yfirferð Gumma og Óla: Endurkoma fótboltans á Anfield og gríðarleg pressa á París

Guðmundur og Ólafur voru á faraldsfæti í vikunni, mættu á leiki á Stamford Bridge og Anfield, og þeir fóru yfir málin í spjalli yfir kaffibolla á leiðinni heim. Spjallið má sjá hér að neðan.

Nóg var af athyglisverðum úrslitum, stórleikjum og mörkum á fyrstu dögum nýrrar vertíðar í Meistaradeildinni. Kannski kom hvað mest á óvart að Messi, Neymar og Mbappé skildu þurfa að sætta sig við jafntefli með PSG gegn Clug Brugge í Belgíu:

„Brugge gerir vel þarna og nær í frábæran punkt. Það er gríðarleg pressa á París í Meistaradeildinni, og líka eftir að hafa ekki unnið frönsku deildina í fyrra,“ sagði Ólafur meðal annars.

Manchester City var hins vegar ekki í vandræðum með að vinna Leipzig, 6-3:

„City-liðið er ógnarsterkt, og sterkara af þessum tveimur sem oft eru tekin saman; City og PSG. Þeir fengu á sig þrjú mörk og þegar þú ert með svona leikstíl eins og City þá getur þú alveg fengið á þig mörk, en þegar þú skorar sex þá vinnur þú nú venjulega leiki. Þeir voru í stuði,“ sagði Ólafur.

Félagarnir fengu frábæran leik á Anfield þar sem Liverpool vann 3-2 sigur á AC Milan, en í sama riðli gerðu Atlético Madrid og Porto markalaust jafntefli. „Þetta er riðill þar sem að hellingur á eftir að gerast,“ sagði Ólafur.

Maðurinn sem gleymdist að skrá var orðinn hungraður

Í C-riðli gerði Ajax sér lítið fyrir og vann 5-1 útisigur gegn Sporting Lissabon. Sebastian Haller skoraði þar fernu:

„Hann er einmitt framherjinn sem að þeir gleymdu að skrá í Evrópuhópinn sinn eftir að hafa keypt hann frá West Ham í janúar, svo hann gat ekki spilað. Þetta var fyrsti Meistaradeildarleikurinn hans, og hann var búinn að bíða hungraður, því hann skoraði fjögur mörk,“ sagði Guðmundur. „Þetta var dýrasti leikmaður í sögu félagsins og þeir gleymdu að skrá hann,“ bætti hann við.

Talið barst einnig að Manchester United sem tapaði á útivelli gegn Young Boys, 2-1.

„Hin tvö liðin í þessum riðli eru Villarreal, sem eru Evrópudeildarmeistararnir, og svo Atalanta sem er feykilega skemmtilegt og öflugt lið. Þetta 2-2 jafntefli liðanna á Spáni var einn af skemmtilegri leikjum fyrstu umferðarinnar, enda eru þetta tvö frábær fótboltalið. Það er stóra vandamálið með þetta tap hjá Manchester United. Það eru alvöru lið þarna,“ sagði Guðmundur og Ólafur tók undir það.

Spjall þeirra félaga má sjá í heild sinni hér að ofan.

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði.