Innlent

Ísfirðingar komast langleiðina að Dynjanda á bundnu slitlagi

Kristján Már Unnarsson skrifar
Frá Dynjandisvogi. Gamli vegurinn er í hlíðinni en sá nýi með slitlaginu við fjöruborð.
Frá Dynjandisvogi. Gamli vegurinn er í hlíðinni en sá nýi með slitlaginu við fjöruborð. Arnar Halldórsson

Nýr vegarkafli í Arnarfirði með bundnu slitlagi var opnaður umferð eftir hádegi í dag. Hann er 4,3 kílómetra langur milli Mjólkárvirkjunar og fossins Dynjanda. Vegurinn um Meðalnes og Mjólkárhlíð færist við þetta úr fjallshlíðinni og niður undir fjöruborð.

Hámarkshraði á kaflanum verður þó fyrst um sinn takmarkaður við 50 kílómetra hraða á klukkustund, bæði vegna hættu á grjótkasti á nýlagðri klæðningu og einnig vegna þess að eftir er að setja upp vegrið og vegstikur, að sögn Guðmundar Óla Kristins Lyngmos, eftirlitsmanns Vegagerðarinnar á Ísafirði. Vonast hann til að stikurnar komi í næstu viku og vegriðið í kringum 20. nóvember. Menn geta þó áfram valið að aka gamla veginn.

Starfsmenn Borgarverks lögðu bundið slitlag á nýja kaflann í síðustu viku.Borgarverk/Einar Örn Arnarson

Opnun nýja vegarins þýðir að núna vantar aðeins einn kílómetra upp á að leiðin milli Ísafjarðar og Dynjanda verði öll orðin malbikuð. Næst fossinum verða vegfarendur áfram að aka eftir gömlum malarkafla. Bundið slitlag er komið á 58 kílómetra af 59, eftir að leiðin styttist um 27 kílómetra með opnun Dýrafjarðarganga í fyrra.

Suðurverk annaðist stóran hluta vegagerðarinnar í Arnarfirði sem undirverktaki Íslenskra aðalverktaka. Borgarverk lagði svo klæðninguna í síðustu viku. Aðeins tíu mánuðir eru frá því verkið hófst, sem var í janúar.

Frá vegagerðinni ofan Penningsdals. Nýi vegurinn liggur ofar en sá gamli á leiðinni upp úr Vatnsfirði. Gamla brúin yfir Þverdalsá til vinstri.Arnar Halldórsson

Í Pennusneiðingi ofan Flókalundar vinna starfsmenn ÍAV í kappi við aðvífandi vetur að búa 3,5 kílómetra kafla undir klæðningu. Verið er að leggja efsta malarlagið út og gert ráð fyrir að það verði heflað á laugardag. Þar horfa menn núna stíft á veðurspána næstu daga og vonast til að fá tvo til þrjá frostlausa daga og ekki of blauta eftir helgi svo að hægt verði að leggja út slitlagið, að sögn Guðmundar Óla.

Þar er þegar búið að setja upp vegrið og er stefnt að því að nýi kaflinn verði opnaður umferð fljótlega, hvort sem það næst að leggja slitlagið á eða ekki. Alls yrði um 6,5 kílómetra langur kafli opnaður, að gatnamótum Bíldudalsvegar.

Hér má sjá frétt sem Stöð 2 sýndi um vegagerðina í september:

Hér má sjá frétt Stöðvar 2 í síðustu viku um framhald verksins á Dynjandisheiði:

Vegagerð Samgöngur Dýrafjarðargöng Umferðaröryggi Ísafjarðarbær Vesturbyggð

Tengdar fréttir

Vegagerð um Teigsskóg boðin út á næstu vikum

Eftir tveggja áratuga deilur um Teigsskóg er komið að því að bjóða út vegagerð í gegnum skóginn umdeilda og er stefnt er að því að vinnuvélar verði komnar á svæðið síðla vetrar.

Keppast við vegabætur áður en holskefla ferðamanna ríður yfir

Vestfirðingar gleðjast yfir því í dag að ferðabókaútgefandinn Lonely Planet hafi sett fjórðunginn í efsta sæti yfir þau svæði heims sem best sé að heimsækja á næsta ári. Ferðamanna bíða hins vegar holóttir malarvegir og einbreiðar brýr fyrir vestan og það stefnir í bið eftir næsta áfanga á Dynjandisheiði.

Óttast að vegagerð á Vestfjörðum verði skorin niður eftir kosningar

Straumur ferðamanna liggur enn að fossinum Dynjanda þótt komið sé fram á haust. Dýrafjarðargöng hafa þegar lengt ferðamannatímann á Vestfjörðum úr þremur mánuðum í fimm, að sögn rútubílaeiganda, sem óttast að frekari vegarbætur í fjórðungnum lendi í niðurskurði eftir kosningar.

Vegagerð hafin milli Mjólkár og Dynjanda

Vinna er hafin við lagningu nýs vegarkafla Vestfjarðavegar í botni Arnarfjarðar, milli Mjólkárvirkjunar og fossins Dynjanda. Kaflinn er 4,3 kílómetra langur fyrir Meðalnes, milli Dynjandisvogar og Borgarfjarðar. Suðurverk annast stóran hluta verksins sem undirverktaki Íslenskra aðalverktaka.

Nýi sunnudagsbíltúrinn að fossinum Dynjanda

Vestfirðingar eru að uppgötva fossinn Dynjanda á nýjan hátt, eftir að Dýrafjarðargöng voru opnuð. Formaður Fjórðungssambands Vestfirðinga segir að það sé orðinn nýi sunnudagsbíltúrinn að aka að fossinum.

Mest lesið


Fleiri fréttir

Sjá meira


×

Mest lesið