Gerði hlé á blaðamannafundi eftir leik til að panta sér McDonald's

Anthony Edwards skoraði 25 stig og Karl-Anthony Towns var með 21 stig og 14 fráköst þegar Minnesota Timberwolves vann 128-117 útisigur á Detroit Pistons. Taurean Prince bætti við 23 stigum í þessum þriðja sigri Úlfanna í röð og þeim fimmta í síðustu sex leikjum. Saddiq Bey var með 21 stig, 13 fráköst og 8 stoðsendingar hjá Detriot.

Edwards er á góðri leið með að verða einn allra skemmtilegasti leikmaður deildarinnar og ekki skemmir fyrir að honum líður vel með athyglina á sér og talar oftast í fyrirsögnum. Að þessu sinni mætti hann á blaðamannafundinn eftir leikinn og bað um smá frið frá spurningum á meðan hann væri að ganga frá pöntun á McDonald's eins og sjá má hér fyrir ofan.

Trae Young var stórkostlegur þegar Atlanta Hawks endaði ellefu leikja sigurgöngu Phoenix Suns með 124-115 sigri. Young skoraði 43 stig í leiknum en hann setti niður sex þriggja stiga körfur.

Kevin Huerter var með aðra fimm þrista og skoraði 19 stig en Atlanta liðið hefur nú unnið átta af síðustu níu leikjum. Eina tapið kom í leiknum þar sem Trae Young gat ekki spilað vegna axlarmeiðsla.

„Við verðum að nýta þennan meðbyr. Þetta var stór sigur fyrir okkur,“ sagði Trae Young eftir leikinn.

Þetta var fyrsta tap Phoenix liðsins síðan 8. janúar. Devin Booker var stigahæstur hjá Phoenix með 32 stig, Mikal Bridges skoraði 24 stig og Chris Paul var með 18 stig.

Klay Thompson skoraði 23 stig og Stephen Curry var með 20 stig þegar Golden State Warriors vann 126-114 heimasigur á Sacramento Kings. Þeir Skvettubræður gáfu líka báðir sjö stoðsendingar. Þetta var áttundi sigurleikur Golden State í röð og liðið er nú með lengstu lifandi sigurgöngu deildarinnar eftir fyrrnefnt tap Phoenix liðsins.

Reggie Jackson tryggði Los Angeles Clippers 111-110 sigur á Los Angeles Lakers í uppgjörinu um Englaborgina en sigurkarfa hans kom 4,1 sekúndu fyrir leikslok eftir að Anthony Davis hafði komið Lakers yfir 12,5 sekúndum fyrir leikslok.

Lakers-liðið vann upp tólf stiga forskot Clippers í fjórða leikhlutanum en varð að sætta sig við fjórða tapið í síðustu fimm leikjum. LeBron James hefur misst af öllum þessum leikjum vegna meiðsla.

Marcus Morris Sr. var stigahæstur hjá Cluppers með 29 stig en hann hitti úr 6 af 7 þriggja stiga skotum sínum. Reggie Jackson var með 25 stig og Serge Ibaka skoraði 20 stig. Hjá Lakers var Anthony Davis með 30 stig og 17 fráköst og Malik Monk skoraði 21 stig, gaf 7 stoðsendingar og tók 7 fráköst.

Pascal Siakam var með 25 stig og 13 fráköst þegar Toronto Raptors vann 127-120 sigur á Chicago Bulls í framlengingu en þetta varð fjórði sigur Toronto í röð. Scottie Barnes, Fred VanVleet og OG Anunoby voru allir með 21 stig. Gary Trent Jr. skoraði reyndar bara 16 stig eftir fimm þrjátíu stiga leiki í röð en setti niður mikilvægan þrist á lokakaflanum. DeMar DeRozan var stigahæstur á móti sínu gamla liði en hann skoraði 28 stig fyrir Bulls.

Lögmál leiksins er vikulegur þáttur um NBA-deildina sem er sýndur á mánudögum á Stöð 2 Sport 2. NBA-deildin er hluti af Sport Erlent sem kostar kr. 3.990 á mánuði. Smelltu hér til að kaupa áskrift.