Félagið hans Beckham vill fá Messi

Lionel Messi gekk í raðir París Saint-Germain í sumar eftir að hafa leikið með Barcelona allan sinn feril. Messi hefur gengið illa að aðlagast í París og því hefur umræða skapast í kringum framtíð leikmannsins sem er þó enn einn sá besti í heimi.

Þar kemur Jorge Mas til sögunnar en talið er að Messi hafi áhuga á að enda feril sinn í Bandaríkjunum. Mas vill ólmur fá Messi til Miami og trúir að meðeigandi sinn – David nokkur Beckham – gæti verið lykillinn er kemur að því að sannfæra Messi um að ganga í raðir félagsins.

„Við höfum áhuga á fá hann í okkar raðir þegar fram líða stundir og David þekkir hann ágætlega. Ef Messi yfirgefur PSG, eða þegar þar að kemur, myndum við vilja sjá hann sem hluta af samfélagi okkar hér hjá Inter Miami,“ sagði Jorge Mas í viðtali við TalkSport.

„Er það raunhæft? Við munum allavega gera okkar besta. Ég er bjartsýnn maður og get séð það gerast,“ bætti Mas við.

Hinn 34 ára gamli Messi er samningsbundinn PSG til sumarsins 2023 og því verður að teljast ólíklegt að hann færi sig um set í sumar en það er aldrei að vita.