Tárvotur Tiger komst ekki í gegnum niðurskurðinn

Tiger Woods er líklega þekktasta nafn sögunnar í golfheiminum, en hann hefur því miður ekki náð sér á strik eftir að hann lenti í slæmu bílslysi í fyrra.

Þrátt fyrir að hafa ekki spilað sitt besta golf á Opna breska meistaramótinu þetta árið hafði múgur og margmenni safnast við 18. flöt til að taka á móti átrúnaðargoði sínu er hann lauk leik í dag.

Tiger fékk dynjandi lófatak þegar hann gekk að flötinni og táraðist þegar hann sá og heyrði í mannfjöldanum.

„Mögulega mitt seinasta Opna breska á St. Andrews“

Eins og áður segir komst Tiger ekki í gegnum niðurskurðinn í dag, en hann endaði hringina tvo á samtals níu höggum yfir pari vallarins. Hann lék hringinn í gær á 78 höggum, en í dag kláraði hann á 75 höggum. Búist er við því að niðurskurðarlínan verði við parið.

Í viðtali eftir hringinn leyfði Tiger tilfinningunum að streyma fram og tilkynnti að þetta hafi mögulega verið hans seinasta Opna breska á þessum sögufræga velli.

„Þetta var mjög tilfinningaþrungið fyrir mig,“ sagði Tiger í samtali við Sky Sports eftir hringinn. 

„Ég er búinn að spila hérna síðan 1995 og ég held að í næsta skipti sem Opna breska verður haldið hér verði árið 2030. Ég veit ekki hvort að líkaminn verður í standi til að spila þá. Mér líður eins og þetta hafi mögulega verið mitt seinasta Opna breska á St. Andrews.“