Ítölsk notalegheit á Nesinu

„Við opnuðum Ráðagerði þann 31. maí á þessu ári og viðtökurnar hafa verið frábærar. Eftir svona langt ferli er mjög gefandi að sjá gamla vini hittast hér og slá borðum sínum saman, þjóna saumaklúbbum, golfurum og vinnustaðahópum sem hafa getað notið sín vel í mat og drykk og setið langt fram eftir. Við viljum einmitt þessa stemmningu, hverfisstemmningu og notalegheit,“ segir Gísli Björnsson en hann rekur Ráðagerði ásamt þeim Viktori Má Kristjánssyni og Jóni Ágúst Hreinssyni.

Gísli segir gamlan sjarma hússins leika lykilhlutverk í upplifun gesta en húsið á sér langa sögu, byggt á árunum 1880 – 85. Árið 1997 var það gert upp og í því bjó fjölskyldufólk þar til þremenningarnir tóku við því. Má meðal annars sjá ummerki þess enn, hæðarmælingar krakkanna eru merktar með blýanti á hlaðinn skorsteininn og þær fengu að halda sér. 

„Við lökkuðum bara yfir það með glæru,“ segir Gísli. 

„Við vildum halda upprunalegu útliti, öllum þessum díteilum, timburstoðum og fallegu listum sem einkenna húsið. 

Við staðsettum eldhúsið því í bílskúrnum og byggðum tengingu á milli húsanna. Við vorum orðnir byggingasérfræðingar á tímabili,“ segir Gísli og viðurkennir að vinnustundirnar hafi verið orðnar ansi margar þegar loks kom að opnun.

„Við erum miklir bjartsýnismenn að eðlisfari og höfum allir unnið lengi í veitingabransanum, byrjuðum 15 ára og höfum komið víða við. Maður sankar að sér reynslu og Ráðagerði er lifandi verkefni. Við stefnum á að reisa gróðurhús hérna á lóðinni þar sem verður hægt að sitja og njóta útsýnisins og borða,“ segir Gísli.

Ítalskir smáréttir og súrdeigspitsur

Maturinn í Ráðagerði leikur við bragðlaukana. Hann er með ítölsku ívafi og samanstendur matseðillinn af fjölbreyttum smáréttum og ómótstæðilegum pítsum.

„Við gerum út á ítölsku antipasti-menninguna. Við Viljum hafa fjölbreytta rétti á borðinu og marga, fullt borð af mat. Þá getur fólk smakkað allskonar ólíka rétti og talað saman um matinn. Pítsurnar eru súrdeigspítsur en við látum deigið kaldhefast í þrjá daga áður en pitsurnar eru síðan eldbakaðar. Það gefur einstakt bragð. Við vorum í heilt ár að þróa uppskriftina,“ 

segir Gísli.

Um helgar er boðið upp á skemmtilegan og fjölbreyttan brunch og að þá eru spennandi breytingar á matseðlinum framundan.

„Við munum bæta spennandi réttum við á allra næstu dögum. Hægt er að nálgast okkur og matseðilinn á instagram og á facebook og svo verður heimasíðan okkar radagerdi.is komin í loftið á fljótlega,“ segir Gísli.