Mikið um slagsmál og ofurölvun í miðborginni

Tilkynnt var um líkamsárásina rétt fyrir klukkan fjögur í nótt. Einn var handtekinn og vistaður í fangageymslu, að því er segir í dagbók lögreglunnar á höfuðborgarsvæðinu.

Örfáum mínútum síðar var tilkynnt um yfirstandandi innbrot í miðborginni. Þrír voru handteknir á vettvangi og er málið sagt í rannsókn.

Annars staðar voru nokkrir ökumenn stöðvaðir fyrir ölvunar- og fíkniefnaakstur og að aka án réttinda. Þeim var sleppt eftir sýnatöku.

Á fimmta tímanum í morgun var tilkynnt um umferðaróhapp þar sem bifreið hafnaði utan vegar á umráðasvæði lögreglustöðvar fjögur sem sinnir Grafarvogi, Mosfellsbæ og Árbæ. Ökumaðurinn reyndist án ökuréttinda.