Ýmsar leiðir til að tak­marka tjón áður en hlýna fer um helgina

Svona líta mörg húsþök út eftir síðustu daga, en tilkynningarnar sem borist hafa VÍS snúa flestar að vatnstjóni.

„Í raun og veru eru lagnir að gefa sig og allskonar lagnagrindur og fleira sem hafa verið að gefa sig og vatnstjón sums staðar mjög alvarleg komið í kjölfarið,“ sagði Sigrún Þorsteinsdóttir, forvarnarfulltrúi VÍS.

Um síðustu helgi fór hitastig yfir frostmark með þeim afleiðingum að snjór bráðnaði á þökum og upp við húsveggi.

„Og þá fórum við að fá mikið af tilkynningum um leka frá þökum, frá gluggum og svölum. Þetta eru í flestum tilvikum tjón sem eru ekki bótaskyld.“

Tjónin er ekki bótaskyld þar sem vatnið sem flæðir inn í hús kemur að utan.

„Og mjög mikilvægt að fólk geri það sem það getur til að fyrirbyggja að slíkt tjón verði og við höfum alveg áhyggjur af næstu helgi því þá fer hitastig aftur yfir núll gráðurnar.“

Gott að búa til vatnsrásir

Sjálf er Sigrún búin að gera ráðstafanir en hún hefur mokað snjó frá húsveggjum.

„Það þarf ekki stórt bil. Þetta er svona snjóskóflubreidd sem maður þarf og þarna gerir maður það að verkum að vatnið á greiða leið til að renna og eins líka er það að taka af niðurföllum og búa til vatnsrásir í kringum niðurföllin.“

Einnig sé mikilvægt að moka af svölum og frá gluggum.

„Og eins ef það er hægt að moka frá þakrennum en auðvitað aldrei með því að setja sig í hættu.“

Hitaþræðir sniðugir fyrir næstu kuldatíð

Þá hvetur hún fólk til að skoða þann möguleika að setja upp hitaþræði í þakrennur.

„Og kveikja síðan á þeim á veturna það er eitthvað sem skiptir ótrúlega miklu máli því þeir gera það að verkum að vatnið á alltaf greiða leið af þakinu.“

Í sjónvarpsfréttinni má sjá snjóklumpa og grýlukerti á þaki. Á lóðinni við hliðina á er búið að hreinsa af þakrennunum og er það gert með því að berja létt á rennuna og þá ættu grýlukerti og snjóklumpar að falla.