Ótrúlegt mark Óðins vekur athygli

Óðinn Þór skoraði átta mörk fyrir Kadetten í gær er liðið lagði Benfica 28-27 í Portúgal. Liðið tryggði þar formlega sæti sitt í 16-liða úrslitunum en önnur úrslit þýddu að Benfica komst einnig áfram, þrátt fyrir tapið.

Schaffhausen fylgir einnig Montpellier frá Frakklandi og Göppingen áfram úr A-riðli keppninnar en lið úr A-riðli munu mæta þeim úr B-riðli í 16-liða úrslitunum. Valsmenn tryggðu sig áfram úr B-riðlinum með frábærum sigri á PAUC frá Frakklandi í gær og eru Valur því mögulegur mótherji Óðins og félaga, en ein umferð er enn óleikin í báðum riðlum og fer fram í næstu viku.

Leikur gærkvöldsins var sá fimmti þar sem Óðinn er markahæstur hjá Kadetten í keppninni en Dagur Arnarsson, leikmaður ÍBV, vakti athygli á einu þeirra á samfélagsmiðlinum Twitter. Líkt og sjá má skoraði Óðinn beint úr hornkasti.

Markið skoraði Óðinn á lykilaugnabliki í leiknum. Rúmar fimm mínútur lifðu leiks og staðan 25-24 fyrir Benfica, auk þess sem hönd dómaranna var uppi. Kadetten sneri leiknum sér í hag og unnu með eins marks mun.