Spjallað um hönnun – „alltaf einn Vá faktor“ segir Hanna Stína

Hanna Stína býr yfir margra ára reynslu og kann að lesa í viðskiptavini sína og koma til móts við þeirra þarfir. Hún segir hennar eigin stíl samt alltaf skína í gegn. Það fyrsta sem hún hugsi inn í stofurými sé „Vá faktor“. Það geti verið glæsileg hilla með lýsingu, mikilfengleg ljósakróna eða risastór vasi. Það sé gaman að taka sénsa í stærðum og ýktum hlutföllum þegar það er hægt.

Hún er óhrædd við að blanda saman viðartegundum í rými og ólíku efni og áferð og segir allt að níu ólíkar efnistegundir geta farið saman inn á heimilið.

„Það má blanda saman en passa uppá harmoníu. Flauel og gróft áklæði til dæmis og mér finnst gaman að sjá bólstrun og stungur. Það má leika sér með liti, ekki bara hafa flata gráa pallettu.“

Hanna Stína lærði innahússarkitektúr á Ítalíu og segir Ítali leiðandi í hönnunarheiminum. Eitt af fyrstu merkjunum sem heillaði hana upp úr skónum er Minotti. Draumaverkefni Hönnu Stínu eru þegar hún getur teiknað allar innréttingar frá grunni, valið húsgögnin og raðað öllu inn áður en fólkið flytur inn.

„Helst vil ég vera búin að kveikja á kertum og raða púðum á rúmið þegar fólk kemur. Skemmtilegustu verkefnin eru þegar kúnninn treystir manni fyrir öllu.“

„Það er svo ótrúlega skemmtilegt að vera partur af verkefnunum og sjá lokaafraksturinn verða að veruleika,“ segir Úlfar Finsen, eigandi Módern en Módern vinnur náið með arkitektum og hönnuðum að fjölbreyttum verkefnum.

„Oft eru húsgagnakaupin lokahnykkurinn í stóru framkvæmdaverkefni því þegar húsgögnin mæta þá er allt svo gott sem tilbúið. Það er líka afar skemmtilegt þegar fólk er að breyta til að fylgjast með hvað eitt húsgagn, ljós eða annað getur breytt miklu í rými. 

Við finnum fyrir miklum áhuga hjá fólki á að gera heimilið að griðarstað. Fólk hugsar meira um hvernig nýta má rýmið og hlutina á sama tíma og hugsað er um þægindi, gæði, fegurð og andrúmsloftið sem skapað er á heimilinu. 

Hringborð skapa til dæmis skemmtilega stemningu og nánd og opna rýmið á skemmtilegan hátt og við höfum tekið eftir miklum áhuga á stækkanlegu hringborðunum frá Kristensen & Kristensen hjá okkur."

„Sinus hægindastóllinn frá Cor sem Hanna Stína notar mikið er hönnunarklassík frá árinu 1976. Form stólsins er einstakt og glæsilegt og stóllinn er einstaklega þægilegur, ruggar þegar sest er í hann og púðarnir dásamlega mjúkir,“ segir Úlfar.

Hanna Stína nefndi að skapa mætti Vá faktor með flottri lýsingu og Úlfar tekur undir það.

„Ljós eru oft álitin skartgripir heimilisins, og er því mikilvægt að finna það rétta. Ljós eru auðvitað praktískur hlutur en líka gaman að horfa á þau sem skúlptúr eða skrautmun. Gaman er að sjá þegar fólk velur sér ljós sem tekið er eftir, og passar heimilinu vel.“