Hellirinn fannst þegar unnið var að greftri grunnar fyrir nýbyggingar við Jarðböðin. Verktaki var að brjóta klöpp þegar þak hellisins gaf sig.
Ljóst er að jarðhitaútfellingar í hellinum eru einsdæmi hér á landi. Mögulega eru örfá dæmi fyrir sambærilegum útfellingum í hraunhellum á heimsvísu, en þörf er á að kanna það betur. Útfellingarnarnar eru jarðmyndanir sem teljast hafa mjög hátt verndargildi sökum sérstöðu og fágætis.
Um miðjan mars var ákveðið að loka hellinum í tvær vikur en hefur sú lokun nú verið framlengd. Er það gert til að tryggja að jarðmyndanirnar verði ekki fyrir óafturkræfu raski. Tók lokunin gildi á hádegi í dag.
Á meðan lokunin er í gildi er stefnt að því vinna að undirbúningi framlengingar á lokuninni til lengri tíma til að vernda hellinn. Þá getur Umhverfisstofnun, í samráði við rekstraraðila Jarðbaðanna, veitt leyfi fyrir ferðum í hellinn sem tengjast frekari könnun hans og öðrum rannsóknum á honum, en öll önnur umferð verður óheimil.
