Svíar reka fimm rúss­neska diplómata úr landi

Sænska ríkisútvarpið greinir frá þessu. Er bent á það í grein þeirra að á morgun kemur út annar þáttur af Shadow War þar sem er fjallað um starfsemi Rússa á Norðurlöndunum. Í fyrsta þætti kom fram að Rússar hafi áformað að vinna skemmdarverk á sæstrengjum og vindorkubúum í Norðursjó ef til átaka kæmi við Vesturlönd.

Í dag boðuðu sænsk yfirvöld rússneska sendiherrann þar í landi, Viktor Tatarintsev, á sinn fund þar sem honum var tilkynnt að fimm starfsmönnum sendiráðsins hafi verið vikið úr landi. Mun það vera vegna þess að þeir brutu á Vínarsáttmálanum.

Stutt er síðan Norðmenn viku fimmtán rússneskum diplómötum úr landi. Var þá tilkynnt að diplómatarnir hafi í raun og veru verið starfsmenn rússneskrar leyniþjónustu.