„Eins og að lenda á stálvegg“

Þetta sagði Selenskí á blaðamannafundi með Justin Trudeau, forsætisráðherra Kanada, í gær. Hann sagði gagnsóknir hafnar og sagðist ekki vilja fara nánar út í það. Yfirvöld í Úkraínu hafa varist allra fregna af átökunum, sem eiga sér stað víða í Úkraínu.

Úkraínumenn segja að sóknin muni taka tíma og að mannfall sé óhjákvæmilegt.

Einn talsmaður úkraínska hersins segir þó að Úkraínumenn hafi náð frekari árangri við Bakhmut í Dónetsk-héraði. Borgin sjálf féll nýverið í hendur málaliða Wagner group en Úkraínumenn hafa verið að sækja hægt fram bæði norður og suður af borginni.

Varnarmálaráðuneyti Bretlands sagði í gær að á undanförnum dögum hefðu Úkraínumenn gert árásir víða í austur- og suðurhluta Úkraínu. Góður árangur hefði náðst á nokkrum stöðum, þar sem Úkraínumenn hefðu brotið sér leið í gegnum fyrstu varnarlínu Rússa.

Þá sagði ráðuneytið að rússneskar hersveitir hefðu staðið sig misvel. Sumar hefðu varist vel og aðrar hefðu flúið í óðagoti og jafnvel í gegnum eigin jarðsprengjusvæði, með tilheyrandi mannfalli.

Enn sem komið er, er útlit fyrir að Úkraínumenn hafi lagt mesta áherslu á sókn í Sapórisjíahéraði og Dónetsk í suðurhluta Úkraínu. Með því að sækja fram þar gætu Úkraínumenn skorið á landbrú Rússa milli Rússlands og Krímskaga. Með því gætu Úkraínumenn gert Rússum mun erfiðara að halda Krímskaga.

Rússar hafa þó byggt upp umfangsmiklar varnir á þessu svæði.

Fregnir hafa einnig borist af aðgerðum Úkraínumanna nærri Kreminna í austurhluta Úkraínu. Rússneskir herbloggarar vöruðu við því í gærkvöldi að Úkraínumenn virtust ætla sér að sækja fram þar.

Sérfræðingar segja þó að Úkraínumenn virðist enn vera að þreifa á vörnum Rússa, í leit að veikleika sem hægt sé að beina meginþunga sóknarinnar að. Þrátt fyrir það er útlit fyrir að Úkraínumenn hafi frelsað nokkur þorp og bæi í suðri, ef marka má rússneska herbloggara sem segja rússneska hermenn hafa hörfað til að forðast það að verða umkringdir.

Úkraínskir hermenn birtu í morgun myndband af sér í þorpinu Blagodatne í Dónetsk.

Búast við erfiðari bardögum en áður

Einn hermaður sem tók þátt í aðgerðunum í Sapórisjía og Dónetsk sagði Wall Street Journal að Úkraínumenn hefðu lent á stálvegg. Þeir hafi sótt fram á tveimur Leopard skriðdrekum frá Þýskalandi og bryndrekum frá Bandaríkjunum. Stórskotalið hafi komið auga á, þar sem þeir voru á jarðsprengjusvæði og þyrlur og orrustuþotur hafi einnig verið notaðar til að ráðast á þá.

„Þeir voru bara að bíða eftir okkur. Tilbúnar varðstöðvar alls staðar. Þetta var eins og að lenda á stálvegg, þetta var hræðilegt,“ sagði hermaðurinn.

Myndefni af þessari misheppnuðu sókn hefur verið birt víða á rússneskum samfélagsmiðlum en þetta var í fyrsta sinn sem Hlébarðarnir svokölluðu sáust á víglínunum í Úkraínu. Svo virðist þó sem að hermennirnir hafi flestir komist undan.

Tveir aðrir menn sem ræddu við WSJ segja að rússnesku hermennirnir sem þeir hafi mætt í suðurhluta Úkraínu séu blanda af atvinnuhermönnum og kvaðmönnum. Baráttuandi þeirra virðist töluvert verri en Úkraínumanna. Einn til viðbótar sagði sína sveit hafa náð árangri gegn Rússum. Þeir hefðu sótt fram og væru þess vegna í góðu skapi.

„Það er óhjákvæmilegt að við missum menn en við reynum að ganga úr skugga um að mannfall þeirra sé meira en okkar.“

Allir sem rætt var við sögðust búast við því að sóknin yrði erfiðari en sókn Úkraínumanna síðasta sumar og haust, þegar þeir frelsuðu Karkívhérað og stóran hluta Khersonhéraðs. Vísa þeir sérstaklega til varnanna sem Rússar hafa byggt upp.

Einn hermannanna, sem tók þátt í aðgerðunum í Kherson í fyrra, sagði að yfirmenn þeirra hefðu sagt að þetta yrði erfiðara. Sá er 28 ára gamall og er kallaður Did. Hann var einn þeirra sem var sendur til að sækja Leopard skriðdreka sem var notaður til sóknarinnar sem nefnd er hér að ofan.

Did varð þó fyrir því óláni að stíga á jarðsprengju og missa annan fótinn. Hann virðist þó nokkuð borubrattur og segir að um leið og hann fái gervifót, ætli hann sér að snúa aftur á víglínuna.

Hér að neðan má sjá eitt af nokkrum drónamyndböndum sem Úkraínumenn birtu í gær af árás úkraínskra hermanna á skotgröf Rússa í Úkraínu. Vert er að vara lesendur við því að myndbandið getur vakið óhug.