Höfnuðu aftur risaboði sem hefði fært ÍA hundruð milljóna

Þetta segir danski miðillinn Ekstra Bladet sem hefur eftir heimildum að FCK hafi hafnað tilboði frá stórliði Lille, sem varð franskur meistari fyrir tveimur árum.

Ekstra Bladet segir að forráðamenn Lille og FCK hafi rætt um kaupverð upp á 15 milljónir evra, eða meira en 2,2 milljarða króna, en að FCK vilji meira. Engar viðræður séu í gangi sem stendur en að engum dyrum hafi verið lokað.

Hákon, sem er aðeins tvítugur, var seldur frá ÍA til FCK fyrir fjórum árum og þá var samið um að ÍA fengi góðan hlut af næstu sölu Hákons. Eftir því sem Vísir kemst næst eru það um 20%, og miðað við það hefði það skilað ÍA á bilinu 400-500 milljónum króna ef FCK hefði samþykkt tilboð Lille.

Enn eru tveir mánuðir til stefnu í félagaskiptaglugga sumarsins og ljóst að FCK ætlar að vanda sig vel til að fá sem hæsta upphæð fyrir Hákon. 

Ekstra Bladet segir að forráðamenn félagsins horfi til þess þegar Victor Kristiansen var seldur til Leicester en fyrir hann hafi fengist 150 milljónir danskra króna, eða um 3 milljarðar íslenskra króna.

Í janúar greindi Ekstra Bladet frá því að FCK hefði hafnað tilboði frá Red Bull Salzburg í Hákon, og hljómaði það upp á 100 danskar milljónir að meðtöldum bónusgreiðslum,eða rétt tæplega tvo milljarða.

Hákon lék 43 leiki og skoraði fimm mörk fyrir FCK á leiktíðinni sem var að ljúka og varð tvöfaldur meistari með liðinu, og danskur meistari annað árið í röð. 

Skagamaðurinn var í íslenska landsliðshópnum sem mætti Slóvakíu og Portúgal, og kom inn á sem varamaður í báðum leikjum. Alls hefur Hákon leikið ellefu A-landsleiki.