Gulli lenti í kulnun: „Allt sem var skemmti­legt var orðið leiðin­legt“

„Ég var nú að grínast með Heimi um að ég yrði líklega mættur þarna í janúar eða febrúar, banki upp á og athugi hvort einhver þurfi ekki að klára sumarfríið sitt,“ segir Gulli og hlær en hann segir líklegt að hann muni sakna Bítisins. 

Aðspurður segist hann ekki hafa fengið leið á Heimi en öllu heldur á vinnutímanum. „Þetta var pínulítið orðið eins og Groundhog Day, búin að taka sömu viðtölin oft. Þetta var orðið svolítið eins og hringiða,“ segir hann.

Viðtal Sindra Sindrasonar við Gulla má sjá að neðan.

„Sko, 2022, strembið ár. Þá var ég að gera átta þátta seríu, dóttir mín var að gera upp íbúð, móðir mín veikist og ég þarf að hjálpa henni að finna hjúkrunarheimili. Ég eiginlega bara hljóp á vegg í janúar. Og þá komumst við að því að ég þyrfti einhvers staðar að skrúfa fyrir og Bítið varð fyrir valinu, “ segir Gulli, aðspurður hvað olli því að hann lenti í kulnun.

Afahlutverkið æðislegt

„Þetta var orðið þannig að það voru allir hálfvitar og vitleysingar í kringum mig nema ég. Það var allt leiðinlegt. Allt sem var skemmtilegt var orðið leiðinlegt,“ segir Gulli. 

„Maður lá kannski andvaka, og náði ekki fullum svefni. Alltaf að vakna klukkan fimm og alltaf að vera hress og kátur í morgunútvarpinu.“

„Gulli segir planið ekki alltaf hafa verið að gerast fjölmiðlamaður. Hann hafi til að mynda hafið flugnám þegar hann var um sextán ára. „Mér fannst það heillandi og tók nokkra tíma en svo hafði ég ekki efni á því lengur. Það dugði ekki að selja Vísi og dagblaðið fyrir flugtímum.“

Hlæjandi segist Gulli ekki hafa hug á að skila Ágústu konunni sinni, en þau hafa verið gift í 24 ár. Að auki á hann fjögur börn og tvö barnabörn. „Afahlutverkið er náttúrlega æðislegt, þá er maður einhvern veginn öðruvísi stemmdur, það er yndislegt,“ segir Gulli.

Á erfitt með að horfa á sjálfan sig

Aðspurður segir hann Gulla byggir standa upp úr þeim fjölmiðlaverkefnum sem hann hefur tekið þátt í. 

„Það er af því að ég er búinn að vera að gera það svolítið mikið einn,“ segir Gulli. Svo minnist hann á útvarpsstöðvarnar sem hann hefur stofnað, með mismiklum árangri. 

„Svo hoppaði maður á milli útvarpsstöðva eins og ég veit ekki hvað, en það var mjög skemmtilegur tími.“

Gulli segist eiga erfitt með að horfa á sjálfan sig í sjónvarpinu. „Það er kallað á mig, Gulli! Þátturinn er að byrja. Þá fer ég út í göngutúr,“ segir hann og hlær.

Loks segist hann langa að vera á heitari stað, aðspurður hvar hann verði eftir tíu ár. „Mig langar svolítið að fara út, til Ítalíu eða Spánar og gera upp hús, prófa það. Vegna þess að það er allt öðruvísi heldur en hér.“