Rándýri Porsche-inn sem lyktaði dregur dilk á eftir sér

Málið má rekja aftur til ársins 2016 þegar Ólöf keypti Porsche Cayenne hjá Bílabúð Benna á um fjórtán milljónir króna. Hún lýsti yfir riftun á kaupunum árið 2018 og höfðaði svo mál árið 2019. Hún hafði þá ítrekað kvartað undan vökvasöfnun í bílnum sem olli meðal annars megnri ólykt.

Eftir þó nokkrar árangurslausar tilraunir til þess að finna lausn á vandanum fór kaupandi fram á riftun kaupsamnings vegna bifreiðarinnar. Þetta felldi Bílabúðin sig ekki við og taldi að um óverulegan galla á bifreiðinni væri að ræða.

Dómarar vanhæfir

Málið fór fyrir Héraðsdóm Reykjavíkur sem reyndist aðeins flókið fyrir dómstóla landsins enda Ólöf þáverandi framkvæmdastjóri Dómstólasýslunnar sem annast sameiginlega stjórnsýslu allra dómstóla á Íslandi; Hæstaréttar, Landsréttar og héraðsdómstólanna átta. Auk þess var eiginmaður Ólafar dómari við Héraðsdóm Reykjavíkur og aðrir dómarar við dómstólinn því metnir vanhæfir. Fól dómstjóri því dómstólasýslunni að finna óháðan dómara til að dæma í málinu. Dómari við Héraðsdóm Reykjaness varð fyrir valinu en verjandi bílabúðarinnar taldi að betra hefði verið að fá dómara utan við dómstólasýsluna til verksins.

Héraðsdómur Reykjavíkur dæmdi Ólöfu í vil. Bílabúð Benna áfrýjaði hins vegar dómi héraðsdóms. Lögmaður bílabúðarinnar sagði skjólstæðing sinn ósammála niðurstöðunni „í öllum atriðum“. Þar að auki hafi það verið „óheppilegt“ að eigandinn skuli hafa haft fyrrgreind tengsl við Héraðsdóm Reykjavíkur þar sem málið var dæmt.

Í niðurstöðu Landsréttar var vísað til þess að bílabúðin hafi sjálf ákveðið að meðhöndla vandræðin með bílinn sem galla. Bílabúðin hafi haft rétt á því að reyna að gera við gallann og fékk bílabúðin fleiri en tvö tækifæri til þess. Taldi Landsréttur því að Ólöfu hafi verið heimilt að rifta kaupunum.

Staðfesti Landsréttur því dóm héraðsdóms. Þarf Bílabúð Benna því að greiða Ólöfu 13,7 milljónir auk dráttarvaxta en þó að frádregnum 4,5 milljónum sem taki mið af afföllum vegna notkunar bílsins í tvö ár. Bílabúð Benna óskaði eftir áfrýjunarleyfi til Hæstaréttar en fékk ekki.

Greiddi áfram gjöldin

Ólöf höfðaði svo aftur mál í júní í fyrra og krafðist þess að bílabúðin greiddi sér 691 þúsund krónur. Ástæðan væri sú að eftir að hún höfðaði upphaflega málið á hendur Bílabúð Benna hefði hún áfram greitt ábyrgðar-, bílrúðu- og kaskótryggingar, bifreiðagjöld, úrvinnslugjöld og önnur gjöld sem hafi verið lögð á hana sem skráðan eiganda Porsche-sins. Taldi Ólöf að Bílabúð Benna hefði átt að greiða þau gjöld frá riftunardegi. Féllst Héraðsdómur Reykjavíkur á kröfu Ólafar.

Koma verður í ljós hvort Bílabúð Benna áfrýi niðurstöðunni til Landsréttar. 

Dómurinn í héraði var kveðinn upp þann 25. júlí en nýlega birtur. Einar Karl Hallvarðsson, dómari við Héraðsdóm Suðurlands, kvað upp dóminn við Héraðsdóm Reykjavíkur.