Fóru til Buffa­lo og hrepptu gull í risa­vaxinni vængja­keppni

„Hér eru allir helstu vængja- og veitingastaðir í Buffalo og líka aðilar erlendis frá. Þetta er gríðarlega vel sótt. Það á enn eftir að tilkynna söluhæsta básinn en við heyrðum frá fólki sem kom á básinn okkar að við höfðum yfirleitt verið með bestu aðsóknina. Það skemmdi síðan ekki fyrir að vinna þessi verðlaun,,“ segir Lýður í samtali við Vísi.

Þeir Lýður og Justin hrepptu aðalverðlaun hátíðarinnar fyrir væng sem kallast lemon-pepper-cajun-honey. Einnig var keppt í ýmsum flokkum, sætum og sterkum vængjum sem dæmi.

„Dómnefnd gekk á milli og smakkaði. Það var bara virkilega gaman að fá þessi verðlaun. Þetta hefur verið heljarinnar törn, við erum búnir að dæla út einhverjum tuttugu þúsund vængjum.“

Og hvað fannst kananum um að Íslendingar hafi mætt og hreppt gullið?

„Við höfum bara fengið hamingjuóskir og kynnst öðrum söluaðilum. Það eru allir næs og jolly. Það hefur allavega enginn kominn brjálaður og sagt að þetta hafi verið ósanngjarnt,“ segir Lýður og hlær.

Í fyrra fóru þeir á hátíðina í skoðunarferð, bæði til að smakka og reyna að fá nýjar hugmyndir. Þá tóku þeir ákvörðun um að sækja hátíðina í ár.

„Við komumst að því að við þurftum ekki að steikja vængina sjálfir, hér er steikingastöð með sextíu djúpsteikingarpotta. Við fórum þá að tala við skipuleggjendur og fórum í gegnum alvöru ferli til að komast inn,“ segir Lýður sem á ekki von á öðru en að þeir fái aftur boð að ári.

En hvernig er borgin Buffalo?

„Hér er allavega mikill fótbolta áhugi, amerískur fótbolta áhugi, það er að segja. Maður þarf bara að passa að segja já þegar maður er spurður hvort maður sé „Bills-fan“. Maður er bara spurður þar til maður segir já. Þeim þykir bara mjög vænt um fótboltaliðið sitt og vængina sína. Hér var buffalo sósan fundin upp og þeir vilja helst ekkert annað en buffalo vængi með gráðosti.“