Utan vallar: Steikjandi hiti Tel Aviv tekur á móti braut­ryðj­endum Breiða­bliks

Aron Guð­munds­son skrifar frá Tel Aviv, Ísrael.

Um er að ræða stóra stund fyrir ís­lenskan fót­bolta en þetta verður fyrsti leikur ís­lensks karla­liðs í riðla­keppni í Evrópu en auk Blika og Mac­cabi Tel Aviv eru belgíska liðið Gent og úkraínska liðið Zor­ya Luhansk einnig í B-riðlinum.

Fyrirfram má reikna með afar krefjandi leik fyrir Blika sem hefur fatast flugið undan­farið heima fyrir í Bestu deildinni, því þó að ísraelska deildin sé ekki með hæst skrifuðu deildum Evrópu­boltans er þar að finna lið með ríka sögu, lið sem hafa áður gert sig gildandi í Evrópu.

Hitinn í Tel Aviv þessa dagana er mikill og nær ó­bæri­legur fyrir Ís­lending sem var farinn að gíra sig í ís­lenska haustið, slag­veðrið sem því fylgir og virkaði það á mann sem kær­komin til­breyting eftir allt of góðan seinni part sumars.

Nei, nei Tel Aviv heilsar með sínum 30 gráðum og steikjandi sól og maður hugsar til leik­manna Breiða­bliks sem þurfa að puða veru­lega til þess að krækja í úr­slit hér á fimmtu­dags­kvöld.

Leikur Breiðabliks við heima­menn mun hefjast klukkan tíu á fimmtu­dags­kvöld að staðar­tíma en þó svo að sólin verði sest mun hitinn ekki hafa lækkað mikið hér í Tel Aviv. Hann mun standa í um og yfir 27 gráðum.

Langt ferðalag að baki

Blikar mættu seint til Tel Aviv í gær­kvöldi eftir morgun­flug frá Kefla­vík, með millilendingu á He­at­hrow flug­velli í Lundúnum. Eftir stutt stopp í Lundúnum tók við rúm­lega fjögurra klukku­stunda flug til Tel Aviv og var hersingin því mætt hingað upp úr klukkan miðnætti að staðartíma. 

Boðað hefur blaða­manna­funda seinna í dag þar sem Robbie Kea­ne, þjálfari Mac­cabi Tel Aviv og fyrrum markahrókur í ensku úrvalsdeildinni, annars vegar og Óskar Hrafn Þor­valds­son, þjálfari Breiða­bliks hins vegar munu sitja fyrir svörum. 

Í kjöl­farið munu Blikar æfa á keppnis­velli morgun­dagsins Bloom­fi­eld leik­vanginum, sem tekur tæp­lega 30 þúsund manns í sæti, og skerpa á hlutunum fyrir leik­daginn sjálfan.

Leikur Maccabi Tel Aviv og Breiðabliks hefst klukkan sjö annað kvöld og verður sýndur í beinni útsendingu á Vodafone Sport. Við verðum á staðnum og færum ykkur allt það helsta frá Tel Aviv.