Fótbolti

Tjá sig um vafasama TikTok-færslu: „Ætluðum aldrei að móðga Victor“

Hjörtur Leó Guðjónsson skrifar
Napoli birti vafasama færslu á TikTok-reikningi sínum þar sem félagið virðist gera grín að stjörnuframherja sínum.
Napoli birti vafasama færslu á TikTok-reikningi sínum þar sem félagið virðist gera grín að stjörnuframherja sínum. Ivan Romano/Getty Images

Ítalska knattspyrnufélagið Napoli hefur sent frá sér yfirlýsingu þar sem félagið tjáir sig um vafasöm myndbönd sem birtust á TikTok-reikningi félagsins. Í myndbandinu virðist félagið gera grín að stjörnuframherja liðsins, Victor Osimhen.

Í myndböndunum er gert grín að vítaklúðri Osimhens gegn Bologna um liðna. Undir myndbandinu hljómar skræk rödd sem segir „gefðu mér vítaspyrnu“. Í öðru myndbandi á TikTok síðu Napoli er Osimhen líkt við kókoshnetu. Umboðsmaður þessa 24 ára gamla framherja hefur hótað því að fara í mál við félagið.

Í yfirlýsingu sem birtist á heimasíðu Napoli í dag segist félagið þó aldrei hafa ætlað sér að móðga framherjann og að félagið harmi það að Osimhen hafi mögulega getað tekið myndböndunum þannig. Í yfirlýsingunni er Osimhen þó aldrei opinberlega beðinn afsökunar.

„Til að koma í veg fyrir að málinu sé snúið upp í eitthvað annað vill Napoli benda á það að félagið ætlaði sér aldrei að móðga eða gera grín að Victor Osimhen, sem er dýrmæt eign félagsins,“ segir í yfirlýsingunni.

„Sönnun á því er sú staðreynd að félagið stóð fast á sínu og hafnaði öllum tilboðum sem bárust að utan í framherjann í sumar.“

Ítalski boltinn

Mest lesið


Fleiri fréttir

Sjá meira


×

Mest lesið