Segir skólana hafa fengið tröll­vaxin verk­efni í fangið án stuðnings

Viðreisn hefur blásið til opins fundar um niðurstöður PISA könnunarinnar og framtíðar skólamála. Fundurinn fer fram á skrifstofu flokksins á Suðurlandsbraut og hefst klukkan átta í kvöld. Ein þeirra sem heldur erindi á fundinum er Sara dögg Svanhildardóttir, bæjarfulltrúi í Garðabæ, sem var skólastjóri grunnskóla Hjallastefnunnar í átta ár.

„Auðvitað eru þessar niðurstöður sláandi en það sem mér þykir kannski einna mikilvægast að sé gert að horfa til þess hvernig menntamálayfirvöld hafa tekið þessi verkefni áfram sem hafa verið alveg gríðarlega stór og víðfeðm; ákvarðanir sem hafa verið teknar á undanförnum árum og verið þess eðlis að sveitarfélögunum hefur þá verið falið að framkvæma.“

Verkefnin séu ótalmörg en nokkur þeirra séu gríðarlega stór og mikil umfangs.

„Skóli án aðgreiningar, ný námskrá 2011 sem var gríðarlega stór og mikil, það er síðan börn af erlendum uppruna sem bara fjölgar og fjölgar og síðan börn á flótta og þetta er allt svo stór verkefni sem grunnskólarnir fá bara í fangið án nokkurs stuðnings svo heitið geti til þess að koma upp sterkum innviðum inn í kerfið, til þess að mæta öllu þessu, því þetta eru engin smá mál.“

Sara segir stjórnvöldum ekki hafa tekist nægilega vel til að innleiða þessar stóru breytingar sem þau hafi hrundið af stað. Úttekt, til að mynda um innleiðingu skóla án aðgreiningar sýni það mætavel.

„Hún kom gríðarlega illa út og staðfesti að sú innleiðing hefur ekki gengið upp og svo eftir það fáum við nýja námskrá 2011 sem var gríðarlega víðfeðm og stór og mikil námskrá sem grunnskólanum var falið að koma til framkvæmdar án nokkurs stuðnings eða fræðslu eða fjármagns til að fylgja því eftir þannig að vel mætti vera.“

Verkefnin fram undan séu þá ekki af minni gerðinni.

„Þau eru gríðarlega stór og mikilvæg. Hægt er að nefna börn á flótta sem er risastórt verkefni sem kemur inn á borð sveitarfélaganna og grunnskólanna og til að byrja með var ekki einu sinni haft orð á því að það þyrfti mögulega að bæta við mannskap eða fá inn fleira fagfólk til að koma að þeim undirbúningi. Það segir sig sjálft að grunnskólakennararnir einir og sér geta ekki haldið utan um þessi verkefni og leitt þau áfram inni í skólunum. Það verður fleira að koma til og fleira fagfólk inn í kerfið.“

Stjórnvöld þurfi að styðja miklu betur við kennarastéttina.

„Hvers vegna í ósköpunum erum við ekki að setja fjármagn í að styðja við endurmenntun kennara til að koma betur til móts við börn af erlendum uppruna, fátækt í tungumálagetu og fleira? Við vitum að grunnskólakennarar hafa mjög misjafna menntun í læsismálum og það eru fjölmörg tækifæri til að taka á því og styðja kennara til að afla sér frekari þekkingar, afla sér færni, til að leysa úr læsi vanda barna þegar þau koma upp og ég þekki það bara sjálf sem fyrrverandi skólastjóri, það er heilmikið mál sérstaklega fyrir nýútskrifaða kennara að takast á við slík verkefni. Við verðum að fara að viðurkenna það og styðja betur við kennarastéttina sjálfa sem er öll að gera það besta sem hún getur gert hverju sinni.“