Úkraínskir sér­sveitar­menn sagðir berjast gegn Wagner í Súdan

Kyiv Post birti í morgun umrætt myndband. Fyrst má þar sjá hermenn sem sagðir eru vera úkraínskir skoða brynvarin farartæki, sem virðast hafa orðið fyrir skotum og sést eitt lík í farartæki. Sá á að vera málaliði Wagner, sem nú er stjórnað af varnarmálaráðuneyti Rússlands.

Sjá einnig: Kreml tek­ur yfir stjórn Wagn­er í Mið-Afrík­u­lýð­veld­in­u

Síðan sést hermaður yfirheyra meintan málaliða sem er bundinn við hlið tveggja annarra manna sem eiga að vera meðlimir sveita sem kallast Rapid Support Forces eða RSF.

Við yfirheyrslu segir hinn meinti málaliði að hann og aðrir málaliðar hafi komið til Súdan gegnum Mið-Afríkulýðveldið, með því markmiði að hjálpa RSF að velta yfirvöldum úr sessi.

Mannskæð átök í Súdan

Umfangsmikil átök hófust í Súdan í fyrra þegar deilur komu upp milli tveggja stjórnenda landsins. Það eru þeir Abdel Fattah al-Burhan, sem leiðir súdanska herinn, og Mohamed Hamdan Daglo, sem leiðir hinar öflugu sveitir RSF.

Þeir tóku höndum saman árið 2021 og frömdu valdarán í Súdan. Til stóð að innleiða RSF inn í herinn í fyrra en Dagalo óttaðist að missa öll sín völd með því að flytja sveitir sínar undir stjórn al-Burhan og hófust átökin þess vegna. Þau voru lengi bundin við Khartoum, höfuðborg landsins, og áttu sveitir RSF undir högg að sækja.

Bardagarnir dreifðu svo úr sér og hefur verið barist í öllum héruðum Súdan. Milljónir hafa þurft að flýja heimili sín og ástandinu hefur verið lýst af forsvarsmönnum Sameinuðu þjóðanna sem martraðarkenndu.

Sjá einnig: Allt að fimm­tán þúsund manns drepin í einni borg

Talið er að nærri því helmingur 49 milljóna íbúa Súdan þurfi aðstoð og að rúmlega 7,5 milljónir hafi flúið heimili sín vegna átakanna. Það gerir krísuna í Súdan að þeirri umfangsmestu í heiminum, sé litið til fjölda fólks á vergangi.

RSF hefur notið stuðnings yfirvalda í Rússlandi í gegnum Wagner Group. Auðjöfurinn Jevgení Prígósín, sem átti Wagner Group, hitti sendinefnd frá Dagalo í síðustu verð hans til Afríku, áður en hann dó í Rússlandi í sumar. Sú sendinefnd er sögð hafa borið kassa af gullstöngum til Prígósjíns sem var borgun fyrir hergögn og hernaðaraðstoð.

Selenskí fundaði með Fattah al-Burhan

Eins og fram kemur í frétt Guardian hefur ekki verið staðfest að nýjasta myndband Kyiv Post sé raunverulegt. Það fylgir þó á eftir þó nokkrum fregnum af úkraínskum hermönnum í Súdan og öðrum myndböndum sem eiga að sýna úkraínska hermenn í átökum við málaliða Wagner.

Þá er talið að Úkraínumenn hafi gert drónaárásir á málaliða Wagner í Súdan.

Vólódímír Selenskí, forseti Úkraínu, fundaði síðasta september með Fattah al-Burhan, á flugvelli í Írlandi. Þá sagði Selenskí að þeir hefðu meðal annars tala um sameiginlega erfiðleika þeirra og þá sérstaklega um ólöglega vígahópa sem fjármagnaðir eru af yfirvöldum í Rússlandi.

Leyniþjónusta úkraínska hersins (GUR) er leidd af Kyríló Búdanóv. Hann er 38 ára gamall fyrrverandi sérsveitarmaður og hefur heitið því að herja á Rússa, hvar sem þá má finna í heiminum.

GUR hefur notið mikils stuðnings frá Leyniþjónustu Bandaríkjanna (CIA) í formi þjálfunar og búnaðar.

Þennan stuðning eru njósnarar og sérsveitarmenn GUR sagðir hafa notað til árása í Rússlandi og víðar.

Í samtali við Kyiv Post vildi talsmaður GUR ekkert staðfesta um mögulegar aðgerðir leyniþjónustunnar í Súdan.