Pogba segist aldrei hafa svindlað

„Allt sem ég hef byggt upp á mínum ferli hefur verið tekið frá mér,“ sagði Pogba í yfirlýsingu sem hann sendi frá sér eftir að bannið var staðfest. Hann fékk hámarksrefsingu.

„Þegar öllum lagalegum hindrunum hefur verið aflétt kemur öll sagan í ljós. Sem atvinnuíþróttamaður myndi ég aldrei gera nokkuð til að bæta frammistöðu mína með því að nota ólögleg efni og ég hef aldrei vanvirt eða svindlað á öðrum íþróttamönnum og stuðningsmönnum liða sem ég hef spilað með eða gegn.“

Pogba ætlar að áfrýja banninu en ef það stendur mun hann ekki geta spilað fótbolta aftur fyrr en 2027, þegar hann verður 33 ára.

Frakkinn var tekinn í handahófskennt lyfjapróf eftir leik Juventus gegn Udinese í 1. umferð ítölsku úrvalsdeildarinnar 20. ágúst. Í sýni hans greindist of hátt magn testósteróns. Sama niðurstaða fékkst úr öðru sýni sem var tekið í október.

Pogba gekk til liðs við Juventus á ný frá Manchester United árið 2022. Hann lék bara tíu leiki með liðinu á síðasta tímabili og var bara búinn að spila tvo leiki áður en hann féll á lyfjaprófinu. Franski miðjumaðurinn lék áður með Juventus á árunum 2012-16. Hann varð fjórum sinnum Ítalíumeistari með liðinu og tvisvar sinnum bikarmeistari.