Allir reknir af velli eftir hópslags­mál í upp­hafi leiks

Það er ekki langt síðan Vísir fjallaði um það að slagsmál lifðu enn góðu lífi í íshokkí vestanhafs og þetta var enn ein sönnunin á því. Í frétt AP um málið segir að „aðalbardagi kvöldsins“ hafi verið á milli Matt Rempe í liði Rangers og Kurtis MacDermid í liði Devils.

Þegar liðin mættust í Madison Square Garden í New York þann 11. mars síðastliðinn ákvað MacDermid að bjóða Rempe upp í dans en sá síðarnefndi neitaði. Síðar í leiknum rak Rempe olnboga sinn í andlit varnarmannsins Jonas Siegenthaler með þeim afleiðingum að hann gat ekki spilað meira það kvöld og Rempe var dæmdur í fjögurra leikja bann.

Það virtist því ákveðið að þeir myndu útkljá sín mál í leiknum sem fram fór á miðikudaginn var en þeir börðust lengst allra. Færðust slagsmál þeirra inn í miðjuhring vallarins eftir að öðrum bardögum kvöldsins var lokið.

Rempe virðist vera í nöp við Djöflana frá New Jersey en hann hefur verið rekinn af velli í öllum þremur leikjum sínum gegn þeim.

„Það var frábært að sjá viðbrögðin og hvernig menn sneru bökum saman. Ég ber mikla virðingu fyrir Rempe. Hann er ungur að árum og gera það sem hann gerir best, ég skil það,“ sagði MacDermid sem hafði ekki spilað síðustu fjóra leiki fyrir lið sitt áður en það kom að hópslagsmálunum. 

Rangers unnu leikinn á endanum 4-3 og eru á toppi Metropolitan-deildarinnar með 51 sigur í 76 leikjum. Devils eru í 7. sæti af 8 liðum með 36 sigra í jafn mörgum leikjum.