„Gaman hvað verið er að tala fal­lega um sam­starfs­fólkið mitt“

„Þetta er eins gott og maður getur vonað, þetta er alveg frábært. Maður veit aldrei við hverju maður á að búast, móttökurnar hafa verið mjög góðar á Íslandi og þetta er ekki síðra,“ segir Baltasar í samtali við Vísi. Meira en tuttugu þúsund manns hafa nú séð Snertingu í bíó hér á landi og Baltasar segir viðtökur góðar. 

Kvikmyndagagnrýni á myndinni hafa verið birt á fjölda miðla, þar á meðal Variety og The Hollywood Reporter.

Frumsýna í Bandaríkjunum í júní

Í gagnrýni á vef Variety eru Baltasar leikstjóri, Bergsteinn Björgúlfsson tökumaður, Sunneva Ása Weisshappel leikmyndahönnuður og Kôki leikkona lofuð fyrir framlag þeirra til myndarinnar.

„Kormákur og samstarfsfélagar kalla fram tilfinningar ástúðar og angistar með gullfallegum sjónrænum blæ. Hann og tökumaðurinn Bergsteinn Björgúlfsson hámarka andrúmsloftið með því að nota nákvæm blæbrigði innan svalra blátóna og hlýrra sepíuþveginna litapalletta. [...]. Þetta er einstaklega kraftmikil, manneskjuleg mynd um fólk sem reynir að komast yfir hrikalegan missi, Fólk sem velur hugrekki og ást til að sigrast á sorginni. Og það er ekkert sem snertir meira en að sjá það í verki,“ segir meðal annars í greininni.

Myndin verður frumsýnd í Bandaríkjunum í næsta mánuði. „Það verður spennandi að sjá hvernig henni gengur í Ameríku. Þetta verður frekar stórt release þar,“ segir Baltasar. Því næst verður hún frumsýnd í Þýskalandi og svo víðar. 

Mörgum hrósað

„Það er líka svo gaman í þessum dómum hvað það er verið að tala fallega um samstarfsfólkið mitt og alla sem eru að vinna að þessu. Við leikmynd og búninga, tökur og klippingu. Það er mikið verið að tala um hvað myndin er fallega unnin,“ segir Baltasar, það sé ánægjulegt að heyra. 

Í gagnrýni Hollywood Reporter er einmitt talað um hve fallega byggð myndin er. 

„Víðáttumikil ástarsaga þar sem fyrirstaðan er tími sem hún gerist í, leyndardómar og afleiðingum stríðs. Þetta er fallega byggð kvikmynd sem veit hvenær á að halda aftur af tilfinningasemi og hvenær það er viðeigandi að leyfa henni að njóta sín. Kvikmyndin heldur jafnvægi tveggja söguþráða, sem eru aðskildir um hálfa öld í tíma. Aðalleikararnir fjórir leika hlutverk sín af mikill næmni.“

Kvikmyndagagnrýni á Snertingu hafa einnig verið birt á The Wrap, The Curvy Film Critic, Gazettely og víðar.