Snúa vörn í sókn og kynna eld­fjalla­leið fyrir ferða­menn

Þetta segir Ragnhildur Sveinbjarnardóttir, framkvæmdastjóri Markaðsstofu Suðurlands, í samtali við Vísi um nýja eldfjallaleið sem var þróuð af Markaðsstofu Suðurlands og Reykjaness í samstarfi við fjölmörg fyrirtæki á svæðunum. Leiðin er hugsuð til að fjölga gistinóttum á svæðunum fyrir íslenska og erlenda ferðamenn.

Fólk sé smeykt við eldvirknina

„Átta eldfjöll vísa leiðina í gegnum söguna af því hvernig þau hafa haft áhrif á land og þjóð,“ segir á vefsíðu Markaðsstofu Suðurlands þar sem leiðin er kynnt en eldfjöllin eru Fagradalsfjall, Hengill, Hekla, Eyjafjallajökull, Eldfell, Katla, Lakagígar og Öræfajökull. Hægt er að skoða leiðina hér.

„Sérstaða þessara svæða er auðvitað eldvirknin. Náttúran á Íslandi mótast almennt á þessu svæði af þessari eldvirkni. Við höfum fundið svolítið fyrir því að ferðamenn hafi áhyggjur vegna eldvirkninnar. Við viljum líka benda á það að við Íslendingar höfum lifað með eldfjöllum í gegnum aldirnar og það er hluti af okkar menningu og sögu.“

Mjög mikill áhugi fyrir leiðinni

Ekki er um að ræða skipulagða ferð sem ferðamenn geta bókað sig í enn sem komið er. Fyrirtæki í ferðaþjónustunni hafi nú þegar sýnt leiðinni mikinn áhuga. 

„Við erum ekki söluaðili, við erum að búa til jarðveginn svo að fyrirtækin geti nýtt tækifærin. Það er mjög mikill áhugi fyrir þessu núna. Fyrirtækin eru búin að vera með í þessari þróun. Þetta er mótað af heimamönnum og við leggjum áherslu á það.“

Þarf ekki alltaf að þjóta

Ragnhildur tekur fram að tilgangur ferðarinnar sé ekki endilega að ferðamenn klífi hvert og eitt eldfjall heldur til að auka umferð þeirra um svæðin í kringum eldfjöllin og lengja þannig dvöl þeirra og viðskipti við fyrirtæki á svæðinu. 

„Allir koma á Reykjanes en dvelja ekki endilega á svæðinu. Það er svo fjölmargt hægt að skoða á Reykjanesinu sem er spennandi. Þetta á alveg við um Suðurlandið líka. Um 90 prósent ferðamanna koma á Suðurlandið en aðeins 50 prósent gista þar. Við erum að benda fólki á að það þurfi ekki alltaf að þjóta.“

Búið að vera í þróun síðan 2021

Þó nokkuð hefur verið fjallað um neikvæð áhrif eldgosanna á Reykjanesskaganum á ferðamennsku hér á landi undanfarið en vinsældir Íslands virðast fara minnkandi. Ragnhildur tekur þó fram að verkefnið sé ekki til að bregðast við þessu og að það hafi hafist áður en að það gaus fyrst á Reykjanesskaganum árið 2021. 

„Þetta er búið að vera lengi í þróun. Þegar það byrjaði að gjósa á Reykjanesi þá höfðum við verið að vinna lengi að þessu hérna á Suðurlandi og okkur fannst tilvalið að hafa Reykjanesið þá með. Þá náum við þessari tengingu alla leið frá flugvellinum og austur að Höfn.“

Ákváðu að fresta því að kynna verkefnið

Ragnhildur bætir við að upplýsingaóreiða um eldgosið á reykjanesinu í erlendum miðlum hafi haft neikvæð áhrif á áhuga ferðamanna á landinu. Þau hafi verið tilbúin að kynna þetta verkefni í haust en ákveðið var að fresta því þar til núna því þeim fannst ekki við hæfi að kynna þetta fyrr vegna ástandsins á Reykjanesinu.

„Við setjum þetta formlega af stað núna til að vekja áhuga á eldvirkninni, hvernig hún spilar inn í líf Íslendinga. Ég segi stundum að við Íslendingar séum með það innbyggt í erfðaefnið okkar. Við höfum búið við það í gegnum árin að náttúran er alltaf að henda einhverju í okkur. Við þurfum alltaf að vera í ákveðinni viðbragðsstöðu.“

Fjölmargir ferðamannastaðir á Reykjanesi og Suðurlandi nota eldvirkni landsins til að auglýsa gagnvart ferðamönnum. Sem dæmi nefnir Ragnheiður hellaferðir, Lava Show í Vík, Katla Geopark og Reykjanes Geopark. Hún bætir við að eldfjallaleiðin rammi inn alla þessa ólíku staði í eina ferð.