Cecilía Rán spilar með Internazionale í vetur

Bayern München staðfestir það á miðlum sínum að markvörðurinn ungi spili allt næsta tímabil með Internazionale frá Mílanó.

Internazionale endaði í fimmta sæti í ítölsku deildinni á síðustu leiktíð. Félagið staðfestir líka fréttirnar um komu íslenska markvarðarins.

Cecilía Rán fylgir þar með í fótspor varnarmannsins Önnu Bjarkar Kristjánsdóttur sem spilaði með ítalska félaginu frá 2021 til 2023.

Cecilía Rán missti af nær öllu síðasta tímabili vegna meiðsla og þarf nauðsynlega á spilatíma að halda. Hún var í íslenska landsliðshópnum sem tryggði sér sæti á EM en spilaði ekki.

Það var útséð um að hún fengi spilatíma hjá aðalliði Bayern á næstu leiktíð en nú fær hún tækifæri til að sýna sig og sanna í ítölsku deildinni.